Dylan non devolve as chamadas da Academia

Dylan non devolve as chamadas da Academia
Dylan, nun concerto do Never Ending Tour
Dylan, nun concerto do Never Ending Tour  

Catro día despois, Dylan continúa sen se pór ao telefone cando do outro lado está a Academia sueca para comunicarlle formalmente que acaba de gañar o Nobel de Literatura. Catro días despois, Dylan continúa sen facer acuse de recibo do premio.


Xa era de universal coñecimento a concesión do Nobel e Dylan saíu a un escenario, unha rotina para o músico que desde 1988 anda polas estradas do planeta co seu Never Ending Tour. Desta volta foi en Las Vegas e, como cabía agardar nunha personalidade tirando a pouco sociábel como a súa, o cantor de Minnesota nen pronunciou unha palabra sobre o premio. Nada surprendente: con muita frecuencia -este cronista pode dar fe- Dylan non pronuncia unha palabra sobre nada nos concertos, fóra do que é estritamente a interpretación -ou reinterpretación- das súas cancións. 

Nada lle é máis proprio ao personaxe Dylan que non facer acuso de recibo do premio. Que actuar como se nada pasase, sen lle dar ningunha importancia a un evento sen precedentes, a concesión do maior galardón das letras universais a un músico. Significa isto que non acudirá a Estocolmo o próximo 10 de Novembro para recoller o galardón? Imposíbel sabelo. Dylan non dá puntada sen fío e o probábel é que a súa mente estea deseñando diversos escenarios, desde aquel lonxíncuo 1964 en que escandalizou o sector máis purista da freguesía folk cando se apresentou sobre o palco cunha guitarra eléctrica -vade retro- o seu foi sempre epatar o persoal, así que calquera sabe, fai parte do espectáculo.

O Nobel está dotado con algo máis de 850 mil euros. En toda a historia só dous escritores recusaron o galardón, o ruso Borís Pasternak e o francés Jean Paul Sartre

En Estocolmo, porén, manteñen a esperanza. "Teño un presentimento de que Dylan pode vir. Pode equivocarme, e claro que sería unha mágoa que non viñese, mais en calquera caso a distinción é súa e non podemos responsabilizarnos do que pase agora. Se non quere vir, será unha grande festa igual", dixo á imprensa a secretaria do Premio, Sara Danius.

O Nobel está dotado con algo máis de 850 mil euros. En toda a historia só dous escritores recusaron o galardón, o ruso Borís Pasternak e o francés Jean Paul Sartre. Non é probábel que Dylan os acompañe, mais se algo caracteriza este artista é a súa imprevisibilidade.

En todo caso, e dada a resistencia de Dylan ao contacto telefónico, a Academia sueca, informou Danius á radio pública do seu país, desistiu xa de facer a comunicación formal ao cantor norteamericano