A nova Sargadelos usa Rosa Díez como modelo publicitario

A nova Sargadelos usa Rosa Díez como modelo publicitario
Captura da conta de Twitter de Sargadelos en que usa Rosa Díez como publicidade.
Captura da conta de Twitter de Sargadelos en que usa Rosa Díez como publicidade.  

Dous chíos, un en castelán e outro en galego, na conta oficial de Twitter da histórica empresa Sargadelos amosan a mudanza de sensibilidade na dirección da compañía. Neles, a ex líder de UPyD Rosa Díez posa en Castro Urdiales (Cantabria) co “icónico Bolso Voluta de Sargadelos”. A resposta nas redes a este uso de Díez por parte dunha marca con tanta bagaxe cultural, galeguista, abala entre o abraio e a indignación.
 


Rosa Díez caracterízase polo seu recalcitrante españolismo e o seu desprezo por toda identidade que non sexa a española. Nos últimos anos mesmo atacou en diferentes ocasións ás galegas e os galegos polo mero feito de selo. Os seus posicionamentos políticos, cadora máis reaccionarios, contrastan coa traxectoria de Sargadelos, polo menos ate que o seu refundador Isaac Díaz Pardo foi apartado en 2008.

 

A moderna Sargadelos configurouse nos debates e nos acordos de Díaz Pardo e o pintor e intelectual exiliado Luís Seoane. Coa Bauhaus alemá como modelo, a empresa foi moito máis ca unha fábrica de cerámica. O Laboratorio de Formas a ela asociado forneceuna de deseños inspirados na historia do territorio galego. Ediciós do Castro acolleu un dos máis importantes, e pioneiros, catálogos de libros de exiliados. Cunha rede de galerías libraría espalladas por Galiza, o Estado e máis alá, serviu de refuxio a disidentes e opositores ao franquismo.

 

Despois dun agre conflito de accionistas, a nova dirección optou por liquidar toda herdanza cultural da marca. Díaz Pardo e os seus fillos quedaron á marxe das decisións dunha compañía que, como amosa ao escoller de modelo publicitario a Rosa Díez, parece esquecer unha parte fundamental da súa traxectoria.



x