Festivais musicais de dezanove países, tentados pola música galega

Festivais musicais de dezanove países, tentados pola música galega
Doretti Sanmartín na recepción aos programadores de 'Focus'
Doretti Sanmartín na recepción aos programadores de 'Focus'  

Representantes de eventos que fan parte do programa 'Focus' visitaron a Deputación da Coruña, onde Goretti Sanmartín, vicepresidenta e responsábel da área de Cultura, lles animou a contratar música galega


Directores de festivais, grandes eventos e centros destinados á promoción e difusión da música en todo o mundo participaron esta terza feira no acto que se desenvolveu no Salón de Plenos da Deputación da Coruña e no que a vicepresidenta, Goretti Sanmartín, animou a que considerasen a inclusión de música galega nas súas programacións. “Estamos a vivir un momento excepcional para a música galega mais precisamos que se coñeza máis alá das nosas fronteiras e para iso os festivais de todo o mundo poderían ser un extraordinario escaparate”, sinalou a tamén responsábel da Área de Cultura. Entre o grupo de programadores que participan no programa 'Focus' hai representantes de festivais e centros culturais de Alemaña, Arxentina, Canadá, Chile, China, Corea, Dinamarca, España, EE.UU., Francia, India, Irlanda, Italia, Malaisia, Marrocos, Noruega, Polonia, Portugal e Reino Unido

A música, defendeu Sanmartín, é un camiño do máis acaído para que estas persoas participantes no programa Focus se acheguen a descubrir “un territorio dunha grande riqueza paisaxística e patrimonial e unha cultura viva, moderna e con moita tradición que busca canles para se dar a coñecer máis alá das nosas fronteiras”.

Agradeceulle a súa participación neste programa, previo á celebración da feira Womex, que ten como obxectivo mostrar a música galega ao vivo a persoas que son responsábeis de centros e festivais musicais e desexou que “contribúan abrir novas vías polas que transitar a nosa cultura", pois "teñen oportunidade de saber como sinte Galiza, cal é a nosa música e como se constrúe a banda sonora dun país que busca tamén as súas vías para se mostrar no mundo”.

No acto interveu tamén, en representación de programadores e programadoras, Lisardo Lombardía, director do Festival de Lorient mais natural de Asturies, que agradeceu a “hospitalidade lendaria” galega ademais de destacar a calidade musical galega, unida a súa cultura en xeral, destacou a relevancia que para Santiago de Compostela supón celebrar por segunda vez o Womex.