Yolanda Castaño e Paco Ibáñez na X Semana de Poesía Salvaxe

Yolanda Castaño e Paco Ibáñez na X Semana de Poesía Salvaxe
Participantes nunha das edicións de Poesía Salvaxe no bar Cazadores de Ferrol
Participantes nunha das edicións de Poesía Salvaxe no bar Cazadores de Ferrol  

Esta cuarta feira comeza a décima edición da Semana de Poesía Salvaxe en Ferrol. Organizada polos poetas Karlotti e Guillermo Fernández en colaboración co concello desta cidade, a Semana da Poesía ofrecerá recitais, pasarrúas e concertos durante os días 19, 20, 21 e 22 deste mes de abril.


Estes catro días repletos de poesía comezan coa lectura da proclama poética a cargo de Guillermo Fernández, Karlotti, Victor M. e Felipe Zapico. A partir deste intre, as rúas de Ferrol encheranse de recitais, lecturas e concertos até o sábado, cando se celebrará o fin de festa cun recital e concerto.

Entre os actos desta semana atopamos recitais e lecturas de poetas de referencia no panorama actual como Xoán Abeleira, O Leo ou María Lado e Lucía Aldao, que se levarán a cabo na rúa e nalgúns locais da cidade. Participarán ademais poetas locais e haberá espazos de micrófonos abertos.

Terán tamén lugar presentación de libros, como a do último poemario de Felipe Zapico, e actuacións como o recital musical de Manolo Bacalhau. A quinta feira, día 20 de abril, Paco Ibáñez dará un concerto no Teatro Jofre. Todos os actos serán gratuítos, a excepción deste último concerto para o que se poden conseguir entradas a partir de 18 euros. 



x