Si houbo un cambio de treinador no Dépor

Si houbo un cambio de treinador no Dépor
Os deportivistas saen do túnel de vestiarios.
Os deportivistas saen do túnel de vestiarios.  

De acordo, é moi cedo aínda para facer avaliacións definitivas. Si, tampouco o xogo foi para botar foguetes. Mais tamén é certo que a equipa tivo algo do que careceu durante a etapa de Víctor Sánchez del Amo ou Pepe Mel, dirección técnica desde o banco.


Un treinador pode verse na maior ou menor fortuna das substitucións de xogadores. Un treinador pode verse se no intermedio é quen de mudar a dinámica da equipa. Un treinador pode verse se é quen de encoraxar futebolistas até o de agora desaproveitados.


En todas esas facetas comezou a mostrar brillo Cristóbal Parralo na súa estrea na liga da Primeira División. A derrota copeira en Riazor face Las Palmas permitiulle tomar nota de aspectos básicos do xogo. A equipa corrixiunos, nomeadamente a partir do primeiro terzo do choque. Continúa a ter, porén, moito traballo por diante. Por exemplo, o primeiro gol en contra non é de recibo nunha equipa de elite. Nen pola facilidade en que os zagueiros foron desbordados nen pola prestación, nula, de Pantilimon na xogada. Facer un gol con cano incluído a un gardamallas que ten altura de ala-pívot é abeirar o ridículo.

 

Mais mesmo aí viuse a man de Cristóbal. A diferenza de episodios anteriores, a equipa non desabou, non se veu abaixo. Ao contrario, comezou a despregar o seu futebol, desta volta cun protagonismo moi destacado para os homes das bandas, un Cartabia que é de lonxe o xogador máis en forma do Dépor neste treito inicial do campionato e un Bakkali que se é quen de apañar unha óptima forma física pode dar moitas tardes de gloria ao combo coruñés.

 

E logo está Celso Borges. Futebolista que en aparencia non está mais que nunca descoida o desenvolvimento do xogo. Está a un minuto de se converter en colíder desta equipa, con Lucas Pérez. Dúas cabezadas súas noquearon o Las Palmas.

 

Co 1-2 no marcador, Cristóbal demostrou que o Dépor ten un treinador. Non ordenou botar atrás as liñas, senon unha presión moi intensa á saída da pelota en campo canario. E acertou nos trocos, a dar minutos a Pedro Mosquera e a Navarro, xogadores que ancoraron a equipa e non deron opción á remontada dos amarelos.

 

Ben, o calendario reserva agora emocións fortes. O próximo visitante, o Atlético de Simeone. O Dépor enxerga o compromiso cunha marxe de 5 pontos sobre o descenso.

 

UD Las Palmas: Raúl Lizoain; Michel, Lemos, Bigas, Dani Castellano, Vicente Gómez, Samper (Aquilani, min. 74), Jonathan Viera (Tana, min. 14), Rémy, Calleri e Vitolo.

RC Deportivo: Pantilimon, Juanfran, Schär, Sidnei, Luisinho, Guilherme, Borges, Fede Cartabia (Edu Expósito, min. 83), Fede Valverde (Pedro Mosquera, min. 61), Bakkali (Fernando Navarro, min. 73) e Lucas.

Goles: 1-0 Rémy (min. 7); 1-1 Borges (min. 36); 1-2 Borges (min. 54); 1-3 Lucas, de penalti (min. 69).

Árbitro: Del Cerro Grande (C. Madrileño). Cartóns amarelos a Michel (min. 45+2) e Juanfran (min. 90+4).

Incidencias: partido da décima xornada da Liga disputado no Estadio de Gran Canaria ante 14.805 persoas.

 



x