CABO DE CRUZ, SD TIRÁN E ARES

As traiñeiras galegas afrontan con forza as vindeiras regatas da Liga ACT

As traiñeiras galegas afrontan con forza as vindeiras regatas da Liga ACT

As embarcacións galegas de Cabo de Cruz, Tirán e Ares están a competir na Liga ACT. Após o seu paso nas dúas primeiras edicións da ACT, a traiñeira de Tirán converteuse nun dos habituais da Liga San Miguel na que leva bogando desde o 2008. Malia que a temporada pasada pugnou nunha dura loita que os mantivo na segunda quenda, este 2017 os de Moaña están a competir no seu mellor momento. Após conquistar o Campionato Galego e deixando atrás os tres anos consecutivos de hexemonía da embarcación de Cabo de Cruz, afrontan “de xeito optimista as vindeiras regatas” que están a preparar con “forza e moitas gañas”.

 

Hai tres palabras que definen a este clube: “paciencia, forza e confianza”, en palabras de Jesús Fernández ‘Patxi’, un dos remeiros do Tirán que após dunha grave lesión que puxo en dúbida a súa volta ó deporte, o pasado 1 de xullo volveu desfrutar da súa grande paixón.

 

Cabo de Cruz, situado tan só a un punto da Tirán na clasificación xeral, afronta as vindeiras regatas sendo conscientes de que os de Moaña van ir a por todas. Após da súa desbancada no Campionato Galego, os remeiros da embarcación dirixida por Óscar Hermo saben que “as regatas finais van ser moi duras e competidas” por iso tentarán estar concentrados ao 200%.

 

A grande sorpresa da temporada sen dúbida é a presencia de Ares na Liga ACT, algo histórico para o clube de remo de Ferrolterra-Eume. Após de lograr o ascenso á Primeira División xa o dicía Julio Alberto Rañales, remeiro e directivo do clube, “é algo histórico, algo incríbel e moi grande, competiremos o mellor que poidamos e desfrutaremos deste soño”. Así o están a facer, competindo como un máis de tu a tu coas grandes traiñeiras galegas, vascas e cántabras, malia estar en onceava posición na clasificación xeral afrontar “con gañas, forza e ilusión as vindeiras regatas”.

 

Calendario Liga ACT

 

En agosto disputarase a tradicional Bandeira de Zarautz, a dobre xornada, e a última fin de semana do mesmo mes as traiñeiras volverán a Galiza que acollerá catro regatas este verán. Xa no mes de setembro, após das dúas fins de semana da Bandeira da Concha, a disputarse en Bizkaia as dúas últimas regatas, o 16 en Bermeo e o 17 en Portugalete, a definir o título e os playoff cos equipos das Liga ARC e da Liga Galega.



x