O persoal de Ferroatlántica move ficha para tentar evitar que Villar Mir venda as súas centrais en Galiza

O persoal de Ferroatlántica move ficha para tentar evitar que Villar Mir venda as súas centrais en Galiza
Asemblea de traballadores de Ferroatlántica
Asemblea de traballadores de Ferroatlántica  

Piden reunirse co presidente da Xunta e os concellos de Cee e Dumbría. Na sexta feira concentraranse na fábrica de Brens.


A intención de Villar Mir de vender as súas centrais hidroeléctricas en Galiza, após obter beneficios millonarios delas nestes anos, preocupa seriamente en Ferroatlántica, a outra pata da unidade produtiva. O comité de Ferroatlántica fixo asembleas nos diferentes centros de traballo que a empresa ten na comarca da Costa da Morte (fábricas de Cee e Dumbría e as centrais hidroeléctricas) nas que o persoal acordou realizar unha concentración o venres 21 de outubro, ás 13:30 horas, na fábrica de Brens.

Nas asembleas informouse das reunións e accións que o comité de empresa está levando a cabo con distintos grupos parlamentarios e as peticións de reunións realizadas tanto ao Presidente da Xunta como aos Concellos máis afectados por esta posíbel venda -Cee e Dumbría-, solicitando que se posicionen "e esixan á empresa que cumpra a legalidade e desista nas súas pretensións". Lembran que as actividades de enerxía eléctrica e de ferroaleacións forman unha unidade produtiva única, cuxa vinculación está  obrigada pola Xunta de Galiza  e ratificada por sentenzas xudiciais do TSXG e o TS.

“Que dea explicacións”

O comité solicitou ao presidente de Ferroatlántica que se desprace a Cee a dar explicacións "no seo do pleno do comité e non no comité europeo, como pretende", nunha manobra para tentar desvincular o problema da comarca as repercusión negativas que tería tanto social como economicamente.