Boas noticias para o independentismo no último inquérito "prohibido"

Boas noticias para o independentismo no último inquérito "prohibido"
Un aspecto do mitin de encerramento de campaña de ERC en Sant Vicenç dels Horts
Un aspecto do mitin de encerramento de campaña de ERC en Sant Vicenç dels Horts  

O oráculo de Escocia prognostica maioría absoluta independentista de aquí a pouco máis de 24 horas. O inquérito "prohibido" de The National -continuidade do que publicou durante a campaña ElNacional.Cat- outorga ao bloco partidario dun Estado catalán propio entre 69 e 73 escanos, a mellor proxección demoscópica tida até o de agora polos soberanistas. Cs non ve en perigo a súa condición de primeira forza en percentaxe de voto, non así en escanos.


O inquérito de Feedback -a consultar aquí- mostra que nas últimas horas as forzas que rexistan unha tendencia alcista son ERC, Junts per Catalunya e o PP, en tanto que van cara abaixo Cs, PSC e a CUP -levemente. A maior queda corresponderíalle aos comúns.

 

No sprint final -o día da reflexión obviamente é unha entelequia e as máquinas organizativas das distintas forzas continúan a peneirar o territorio até a última hora disponíbel-, o bloco independentista pode ollar con maior optimismo o desfecho, o desenlace do 21-D, sempre segundo o inquérito que publica estes días -non suxeito á xuridisción española que prohibe as sondaxes nas últimas cinco datas antes do día das urnas- o rotativo soberanista escocés The National.

 

ERC e Cs continúan a se disputar a primeira praza e aquí o resultado final pode deitar o paradoxo de a formación republicana ter máis escanos e, aliás, menos votos do que a lista de Arrimada. A chave desa eventual contradición? Pois que ERC tería unha mellor distribución territorial dos seus sufraxios, en tanto que Ciudadanos sería singularmente forte na circunscrición eleitoral de Barcelona, a máis populosa do Principat.

 

No outro "inquérito prohibido", o que publica El Periódico de Andorra, as noticias apontan tamén a unha hipotética maioría independentista -embora máis axustada-, con ERC claramente como primeira forza.

 

Corrección: na edición orixinal desta noticia consignouse por erro a marca eleitoral "Junts per Sí" cando en realidade o seu nome correcto é "Junts per Catalunya".



x