ERC avanza que si estará nas eleccións do 21D

ERC avanza que si estará nas eleccións do 21D
Reunión da Permanente Nacional de ERC
Reunión da Permanente Nacional de ERC  

Esquerra Republicana de Catalunya quer converter as eleccións "nunha oportunidade para consolidar a República".


Comeza a ser evidente que o soberanismo aceita de facto a situación criada pola disolución do Parlament e acudirá ás eleccións convocadas por Rajoy ao abeiro da aplicación do artigo 155.

 

Foi ERC -a forza que lidera os inquéritos- a primeira das soberanistas en declarar abertamente que si irá a eses comicios e fíxoo despois de reunir a súa permanente nacional.

 

A única dúbida está en como debe concorrer o soberanismo e nese sentido ERC deixa aberta á posibilidade de non concorrer como tal partido (nas eleccións de 2015 a formación republicana foi coligada coa antiga Convergència na plataforma JxSí).

 

"Encontraremos a maneira de participar o 21-D, presentándonos [como partido] ou non", dixo o portavoz de ERC, Sergi Sabrià, esta segunda feira para a seguir se posicionar a favor de participar nas eleccións "conxuntamente con todos os que defenden a República".

 

O obxectivo de ERC é consolidar "esta República fráxil" -o partido liderado por Junqueras admite que o Estado nacente non ten capacidade suficiente para se impor- e ao tempo rexeitar o 155.



x