As Illas Feroe teñen unha cita coa autodeterminación en 2018

As Illas Feroe teñen unha cita coa autodeterminación en 2018

En abril dese ano realizarán un referendo onde este arquipélago, baixo soberanía dinamarquesa, decide se se dota da primeira constitución da súa historia.


Situadas entre Escocia, Noruega e Islandia, as Feroe son un arquipélago de 18 illas (17 delas habitadas) de 1.400 quilómetros cadrados onde viven apenas 50.000 persoas, 20.000 delas en Tornshaven, a capital, e a súa contorna. Son un área autónoma mais pertencente ao Reino de Dinamarca, nunha situación similar á de Groenlandia. Nas eleccións lexislativas que decorreron en 2015 os partidos independentistas atinxiron 19 dos 33 escanos do Parlamento, propiciando un novo escenario electoral: derrota da dereita e posibilidades de goberno cunha coligazón entre centro-esquerda dinamarqués e independentistas.

E así foi. En setembro de 2015 atinxíase un pacto de goberno entre socialdemócratas e independentistas. Nese pacto incluíase o compromiso de elaborar unha constitución para Feroe, un texto no que se recoñecese o dereito á autodeterminación do arquipélago. A Constitución tería que se someter a referendo, o que terá lugar en abril de 2018, e de ser aprobada abriría as portas a unha consulta independentista.

Independencia proclamada e anulada por Dinamarca

As Feroe levan baixo dominio de Dinamarca, con breves irrupcións, desde 1.388. Non foi unha relación amistosa, O Parlamento das Feroe (Løgting) foi suspendido ou abolido en varias ocasións, como en 1856; e o idioma e cultura propias das illas foron marxinadas pola lexislación imposta desde Copenhage.

En setembro de 1946 realizouse un referendo, consulta na que os votos a prol da independencia representaron o 50,8% dos emitidos fronte ao 49,2% de sufraxios partidarios de seguir en Dinamarca. As Feroe declararon a independencia o 18 de setemgro, mais dous días despois Dinamarca anulou a declaración.

En 1948 as Feroe obtiveron un auto-goberno que daba competencias ao goberno autónomo sobre diferentes eidos. En virtude desta autonomía, as Illas Feroe decidiron en referendo non facer parte da Unión Europea.