GRANDE RESULTADO DO NACIONALISMO CORSO

Macron atinxe maioría parlamentar nunhas eleccións con abstención récord

Macron atinxe maioría parlamentar nunhas eleccións con abstención récord
Emmanuel Macron
Emmanuel Macron  

Os Republicanos, segunda forza mentres PS cae a 42 escanos. Francia Insubmisa obtén 27 deputados e a Fronte Nacional, 8. O nacionalismo corso entra na Asemblea, con 3 parlamentares.


Emmanuel Macron obtivo este domingo unha nova, e anunciada vitoria na segunda volta das lexislativas francesas se ben o triunfo foi menos contundente do que predicían analistas e medios e empañado por unha altisima abstención, de 57 por cento. Porén, vitoria e ampla ao fin e ao cabo.

 

A República en Marcha de Macron e o seu aliado, o centrista MoDem logran 341 escanos nun Parlamento de 577. Unha maioría que lle permite encetar o programa de reformas e cambios que o presidente vén publicitando desde hai meses como indispensábeis.  

 

Os Republicanos e os seus aliados sofren unha importante caída mais son segunda forza parlamentar, con  135 escanos. A dereita tradicional gala logra resistir a ‘’vaga’ Macron  e serás a principal forza da oposición. Quen sofre nas urnas un importante golpe é o Partido Socialista, que apenas logrou 42 representantes. Apenas farangullas para quen foi nestes anos o principal partido de Francia e tiña máis de 250 deputados na Asemblea.

 

Francia Insubmisa atinxe os 27 deputados e terá grupo parlamentar de seu. A Fronte Nacional logra 8 escanos, por baixo dos 15 que permiten ter grupo. Le Pen logra entrar na Cámara, vencendo o ‘cordón republicano’ en segunda volta.

 

O nacionalismo corso entra e con 3 deputados, amosando o bo momento do movemento na illa. Após lograr gañar as eleccións corsas en 2015, Pè A Corsica (que une rexionalistas nacionalistas e independentistas) sitúa 3 parlamentares en París. A isto engádese que a Polinesia elixiu un representante independentista para a Asemblea.

 

Mais a protagonista dos comicios deste domingo foi a abstención, 57 por cento. Apenas catro de cada 10 franceses que podían ir a votar optou por facelo. Unha porcentaxe mínima para un país que sempre rexistraba importantes porcentaxes de participación nas urnas.

 



x