"A QUERELA DA FISCALÍA PERSEGUE IDEAS, NON DELITOS"

Puigdemont continuará en Bruxelas mentres non receber garantías de ter un "xuízo xusto"

Puigdemont continuará en Bruxelas mentres non receber garantías de ter un "xuízo xusto"
Puigdemont, nun momento da súa comparecencia entre dúas conselleiras
Puigdemont, nun momento da súa comparecencia entre dúas conselleiras  

O president negou que viaxase a Bruxelas a tramitar unha petición de asilo. Puigdemont enfatizou que se acha en Bruxelas non na súa calidade de cidade belga, senón na súa condición de capital da Unión Europea. Puigdemont -acompañado por 7 consellers, os 5 que se desprazaron inicialmente con el a Bélxica e 2 máis vindos de Irlanda- denunciou o "desexo de vinganza" do Estado español.


O Govern continúa operativo, é lexítimo e non acata a súa destitución. Primeira mensaxe de Puigdemont. Segunda: non ten intención de escapar á acción da xustiza española, mais non se moverá de Bruxelas mentres non receber garantías de que poda ter un xuízo "xusto e independente, con división de poderes".

 

Terceira mensaxe: o Govern está en Bruxelas, mais tamén en Catalunya -onde fican Junqueras e o resto dos consellers, encarregados de xestionar o día a día até as eleccións do 21D.

 

Puigdemont revelou que a estratexia do Govern foi decidida nunha reunión a pasada sexta feira á tarde (paralela á aquela en que o consello de ministros activou o 155). Nesa xunta resolveuse pór en marcha catro liñas de actuación: a) ir a Bruxelas para "no corazón de Europa" denunciar a "politización" e falta de neutralidade do poder xudicial español, proba do "déficit democrático" do Estado español; b) manter operativo o Govern; c) apoiar as iniciativas de "sindicatos e cargos institucionais" que tentan "evitar a aplicación do artigo 155" para manter vivo o autogoberno de Catalunya e d) tomar as eleccións do 21D como un "reto democrático".

 

A determinación do Govern sería, pois, aceitar o desafío que lle formula Madrid cunhas eleccións que a Moncloa plantexa como unha sorte de plebiscito arredor do 155.

 

Nese sentido, Puigdemont avanzou que o soberanismo aceitará os resultados do 21D, foren os que foren, mais se perguntou se o "Goberno do 155" fará o propio na eventualidade de o bloco independentista revalidar a súa maioría no Parlament.

 

Non pedirá o asilo

 

"Non estou aquí para pedir o direito de asilo. Non estou aquí en Bélxica, senón na capital de Europa. Estou aquí para actuar con liberdade e seguranza", dixo.

 

Interpelado por un xornalista sobre se se vai pór a disposición da xustiza española, Puigdemont dixo que o faría de maneira imediata se "tivese garantía dun tratamento xusto", que non é o que cabe neste momento agardar da actuación do Estado en Catalunya, engadiu.

 

"Máxima prioridade: evitar a violencia"

 

Todo o feito polo Govern desde o 27O -día da declaración da indepencia e da activación do 155- até agora veu ditado por unha determinación, a de conducir os acontecimentos "sempre pola vía da paz e do diálogo", a máxima prioridade, dixo, "da maioría da sociedade catalá e do Govern".

 

Screen Shot 2017-10-31 at 12.53.23Esa determinación pacifista é a que tería levado ao Govern a "non pór os funcionarios públicos nunha situación difícil e a non os obrigar a tomar partido" por unha das dúas legalidades en conflito, a catalá -DUI- e a española -155.

 

Esa decisión de non comprometer os servidores públicos -pola súa condición de tais deben ser neutrais nun conflito político, remarcou Puigdemont- tería como consecuencia "ralentizar" o procés, dixo o president, quen en todo caso antepuxo o desenvolvimento pacífico dos acontecimentos a calquera outra consideración.

 

Nunha intervención en que Puigdemont se revelou como un consumado políglota -falou catalán, español, francés e inglés- houbo tamén un momento para dirixir á sociedade catalá unhas palabras carregadas de solemnidade: "Pido aos cataláns que se preparen para un camiño longo. O Estado español só entende o uso da forza". E nese campo, o da violencia, o soberanismo nunca vai xogar, proclamou.



x