PRIMEIRA CONFERENCIA DE IMPRENSA DO PRESIDENTE ELEITO

"Se Putin gosta de Trump iso é un activo, non un pasivo"

"Se Putin gosta de Trump iso é un activo, non un pasivo"
Imaxe da primeira conferencia de imprensa de Trump como presidente eleito
Imaxe da primeira conferencia de imprensa de Trump como presidente eleito  

Trump dixo que gosta das conferencias de imprensa e que o seu costume era dar unha case todos os días. Non o fixo até o de agora, apenas a 9 días de xurar o cargo, dada a avalancha de "noticias inexactas" que circulan sobre el, alegou. Admitiu que os EUA foron hackeados por Rusia, mais tamén, dixo, "por outros países".


A conferencia de imprensa de Trump pivotou basicamente sobre un asunto: os seus vínculos reais ou supostos con Rusia. O presidente eleito negou o contido do dossier entregado polo senador McCain ao FBI e, como xa fixera en twitter, cualificouno de noticia fraude. Parabenizou os meios que non se fixeron eco del e mostrou a súa confianza en que non fora filtrado por axencias de intelixencia. Caso contrario, alegou, sería unha "tremenda mancha" no seu legado.

Trump, moi presionado sobre o asunto da hipotética inxerencia rusa na campaña eleitoral, acabou concedendo que "a respeito do hackeo, creo que foi Rusia", mais a seguir optou por diluír a responsabilidade da Administración Putin nunha sorte de práctica xeneralizada: "Creo que tamén somos hackeados por outros países". E nese sentido sinalou Beijing.

O presidente eleito voltou a utilizar declaracións formuladas por Putin como material da súa defensa. "O presidente Putin e Rusia emitiron un comunicado hoxe no sentido de que esta noticia fraude era unha noticia fraude. Eu respeito que dixese iso".

Perguntado directamente pola imprensa sobre se aceita o feito de que Putin tivese manobrado para el lle gañar as eleccións a Clinton, Trump deixou ver que é un home de empresa e formulou a cuestión en termos empresariais: "Se Putin gosta de Trump eu considero isto un activo, non un pasivo, porque nós temos unha relación horríbel con Rusia". A seguir, en ton entre desafiante e burlón, repuxo: "Vosté considera honestamente que Hillary sería máis dura con Putin do que vou ser eu? Alguén realmente pode acreditar nisto?".

Cámaras nos hoteis nos lugares máis estraños

Trump aludiu oblicuamente á hipótese de que Rusia tivese no seu poder algún vídeo seu de carácter sexual tomado durante unha visita a Moscova. Explicou que sempre que viaxa toma precaucións especiais, que sempre está rodeado de garda-costas e que sempre lle insiste aos membros da súa comitiva que teñan tino, que nos hoteis hai cámaras ocultas "nos lugares máis estraños". "Ou vas a modo ou acabarás véndote nalgún programa nocturno na TV", iso é o que lles di aos seus cando viaxan.

"Esta Administración creou ISIS"

O presidente eleito defendeu a alianza con Rusia porque "pode axudarnos a combater o ISIS" e nese sentido non dubidou en acusar a Administración Obama de ter criado o Daesh por ter "abandonado [o escenario de combate] no pior momento". "No baleiro [deixado polos EUA] formouse o ISIS". E a seguir engadiu: "Se Putin gosta de Trump, eu a iso chamaríalle un activo, non un pasivo. Non sei se me vou levar ben con Putin, agardo que si, aínda que tamén hai bastantes posibilidades de que non".