Lugo pón en marcha unha Escola de Narración Oral

Lugo pón en marcha unha Escola de Narración Oral
Presentación da Escola de Narrativa de Lugo
Presentación da Escola de Narrativa de Lugo  
A iniciativa conta coa colaboración da Asociación de Escritores en Lingua Galega. A escola arrincará en setembro cun obradoiro de creación literaria.

A cidade de Lugo contará, a partir de setembro, cunha Escola de Narración Oral que ensinará técnicas para contar historias e afondará na tradición da literatura oral. A iniciativa nace da man da Área de Cultura do Concello e da Asociación de Escritores en Lingua Galega (AELG). A actividade coa que iniciará a súa andaina a escola consistirá nun obradoiro de creación literaria que impartirá o propio coordinador da escola, Antonio Reigosa, xunto ao escritor lucense Isidro Novo. Con este obradoiro, aberto a todos os cidadáns maiores de 15 anos, abordaranse todos os ámbitos da oralidade, dende a tradición ás tendencias máis innovadoras, co fin de inspirar a novos creadores e de estimular novas correntes baseadas nesa oralidade que tanto marcou a nosa literatura.

Abordaranse todos os ámbitos da oralidade, dende a tradición ás tendencias máis innovadoras

O curso, baixo o título Iniciación á narración oral, desenvolverase ao longo de trece xornadas de dúas horas de duración do 25 de setembro ao 18 de decembro. As clases serán os martes de 18:00 a 20:00 horas no C.S. Uxío Novoneyra e a inscrición gratuíta poderá formalizarse do 27 de xuño ao 15 de setembro no Rexistro Xeral do Concello de Lugo. As prazas son limitadas e adxudicaranse por rigorosa orde de inscrición.

Contidos
A escola terá a súa sede no Centro Social Uxío Novoneyra e as clases impartiránse nas aulas que se habilitarán para a Escola de Música, coa que compartirá dependencias. Os contidos abranguen unha variada escolma de materias co fin de que os alumnos e as alumnas acaden coñecementos das técnicas da narrativa oral como as linguaxes non verbais, a cultura tradicional e a oralidade, a destreza oral, a lectura en voz alta ou as palabras con memoria.

 



x