A POLICÍA IDENTIFICOU 9 DOS PARTICIPANTES NA ACCIÓN

Militantes do BNG toman tamén a Casa Cornide en denuncia do espolio

Militantes do BNG toman tamén a Casa Cornide en denuncia do espolio
Toma simbólica da Casa Cornide na Coruña por militantes do BNG
Toma simbólica da Casa Cornide na Coruña por militantes do BNG  E.D.

Mentres no Parlamento de Galiza os grupos popular e socialista debaten crear unha comisión parlamentaria na que morra convenientemente o asunto de Meirás, o BNG teima en manter viva entre a veciñanza a reclamación de xustiza e reparación ás vítimas do que foi o espolio do Pazo de Meirás. Espolio que tivo derivacións, como a da Casa Cornide, entregada a Franco en 1962. Esta mañá, membros do BNG despregaron unha faixa no balcón do edificio, tal e como fixeran o pasado 30 de agosto no Pazo en Meirás.

 


A Casa Cornide é un antigo edificio señorial situado no casco vello da Coruña diante da Colexiata de Santa María do que se encaprichou Carmen Polo, a muller de Franco, e que en 1962 foi levada a poxa polo propietario, o Concello da Coruña. A poxa gañouna un personaxe clave no espolio de bens públicos e privados na Coruña e contorna iniciado nos anos da guerra e continuado durante toda a ditadura: Pedro Barrié de la Maza. Daquela, a comezos dos sesenta, o réxime franquista mudara un tanto o método de latrocinio. Facíao a través do aparato administrativo. Todo legal até que chegaba a mans dos Franco.

 

“Non é só o Pazo de Meirás nin as pezas do Pórtico da Gloria, é moito máis. E aquí, na Coruña, Franco tamén se fixo de maneira ilexítima con patrimonio público”, explicou Avia Veira, concelleira do BNG na cidade, acompañada por Xosé Emilio Vicente, membro da Executiva Nacional nacionalista, a pé da Casa Cornide minutos despois de que militantes do partido accedesen á balconada do edificio con unha escada metálica e despregaran unha faixa co lema: “Que nos devolvan o roubado”.

 

Avia Veira, concelleira nacionalista na Coruña, e Xosé Emilio Vicente.“Esta casa, esta xoia do século XVIII, tivo a mala sorte de ser vista por Carmen Polo, a quen se lle antollou. E desde ese momento, a máquina do franquismo, púxose a funcionar. Así, o 6 de xullo de 1962 anunciouse no BOP a poxa. Acudiron só dúas persoas, o subxefe do Movemento na Coruña e Barrié de la Maza. Gañou a poxa Barrié por 305.000 pesetas. E cando asinou as escrituras, o 3 de agosto, especificou que a casa se transmitía a Carmen Polo”, recordou Avia Veira.

 

A concelleira nacionalista lembrou que o BNG xa pediu no pleno municipal que se investigara o proceso polo que se levou a unha poxa a Casa Cornide. Tamén subliñou que os nacionalistas levan reclamando en diferentes institucións a devolución ao patrimonio público do Pazo de Meirás e todos os bens espoliados a partir da estrutura de favores que se conformou en torno ao espolio do Pazo. A semana pasada, Ana Pontón, a portavoz nacional do BNG, presentou en Xenebra unha denuncia diante da ONU para a devolución do Pazo de Meirás ao pobo galego e a ilegalización da Fundación Franco por exaltación do franquismo.

 

Esta mañá, entre berros de “franquismo, nunca máis!”, medio cento de militantes e cargos públicos do BNG concentráronse fronte a Casa Cornide, e oito deles, entre os que se encontraban Bieito Lobeira, o secretario de organización da formación, e Manuel Méndez, responsable do consello local. Permaneceron durante dúas horas, entre as 11:00 e as 13.00, no balcón do edificio para manter viva na rúa a demanda de xustiza e reparación respecto ao Pazo de Meirás e o conxunto de bens espoliados. 

A policía identificou 9 participantes na acción, as 8 persoas que subiran ao balcón coa faixa e outra que portaba a escaleira de man.

 

Nota: na foto interior, da autoría de E.D., aparecen Avia Veira e Xosé Emilio Vicente



x