O LIBRO XA VAI POLA SEGUNDA EDICIÓN

'Os nomes do terror' apreséntanse en Ourense

'Os nomes do terror' apreséntanse en Ourense
Presentación de 'Os nomes do terror'
Presentación de 'Os nomes do terror'  

As 13 investigacións que, por primeira vez, se achegan de xeito sistemático ao nome e o enderezo dos verdugos do 36 vanse apresentar esta cuarta feira en Ourense. O café Auriense, ás oito e cuarto do serán, acollerá unha mesa de debate arredor de Os nomes do terror. Galiza 1936: os verdugos que nunca existiron (Sermos), o libro colectivo que xunta os estudos.


O profesor Xosé Manuel Cid, o membro do consello de administración de Sermos Galiza Nemesio Barxa, o coordinador de Os nomes do terror Xoán Carlos Garrido e máis dúas das autoras participantes, Ana Cebreiros e Julio Prada, tomarán a palabra para explicar a achega fundamental do volume. Logo de que o movemento social pola recuperación da memoria histórica se centrase inicialmente en reparar as vítimas, chegou o intre de pescudar en quen reprimiu, en quen matou.

 

Varios dos estudos incluídos en Os nomes do terror -que en apenas dos dous meses esgotou a súa primeira edición e encheu actos de presentación por toda Galiza- atinxen o terror desatado polo autodenominado bando nacional en Ourense e nas bisbarras da contorna. “Pero seguían os paseos, e seguían...Eu estou falando do 15 de xaneiro de 1937, e aínda había paseos, e seguiunos habendo durante a guerra. Aquí pasáronse, aquí pasáronse, pasáronse de forma horrorosa", expón un antigo militante da Falanxe ourensá que pediu marchar á fronte para non participar nos asasinatos.

 

A investigación da profesora Ana Cebreiros, incluída no libro, estuda a "sección feminina" desa mesma Falanxe. "Falanxe potenciou o papel das mulleres como vixiantes e delatoras dos seus veciños", escribe, “as mulleres dos falanxistas atemorizaban aos familiares dos fuxidos, unha veciña da miña nai enchíana de ameazas de que ían matar a outros membros non fuxidos da vila”.



x