EN CUNTIS

O Outono da memoria comeza esta sexta feira coa apresentación de 'Os nomes do terror'

O Outono da memoria comeza esta sexta feira coa apresentación de 'Os nomes do terror'
Un momento dunha das apresentacións de 'Os nomes do terror'
Un momento dunha das apresentacións de 'Os nomes do terror'  

Esta sexta feira 10 de novembro a Casa da Cultura Roberto Blanco Torres de Cuntis acollerá a partir das 20 horas a  apresentación do libro Os nomes do terror (Sermos Galiza). Nela participarán dous dos seus autores, Pepe Álvarez e Xoán Carlos Garrido. A obra, que indaga na lista de represores que perpetraron crimes após o golpe fascista, achega información sobre os nomes destes verdugos e as súas formas de actuar.


O libro pretende deitar luz sobre a represión fascista na Galiza e os procedementos e actuacións que levaron a cabo represores, Igrexa e tribunais da época. Publicado por Sermos Galiza o 25 de xullo deste ano, o traballo está dirixido polos historiadores Xosé Ramón Ermida, Dionisio Pereira, Eliseo Fernández e Xoán Carlos Garrido e nel participan algúns dos máis importantes historiadores galegos especializados no tema, como Emilio Grandío ou Xosé Álvarez.

 

A segunda xornada do programa “Outono da memoria” vaise realizar a segunda feira 13 de novembro no Centro Público Integrado Aurelio Marcelino Rey García, cun coloquio do xornalista Carlos Hernández cos alumnos de terceiro e cuarto da ESO. A sexta feira 17 será Luís Bará, deputado do BNG, o encarregado de apresentar na Casa da Cultura o seu libro Non des a esquecemento. Relatos do xenocidio fascista en Gliza, da resistencia e da solidariedade, a partir das 20 horas.

 

Para rematar co programa, o escritor e historiador Xosé Fuentes Alende recibirá o sábado 18 o I Premio de Investigación en Humanidades e Ciencias Sociais Olimpo Arca. A partir das 12 horas na Casa da Cultura.



x