JUAN DÍAZ VILLOSLADA NO SERMOS262

"Os outros precandidatos son máis aparato cá min"

"Os outros precandidatos son máis aparato cá min"
Juan Díaz Villoslada, na redacción do Sermos.
Juan Díaz Villoslada, na redacción do Sermos.  

Dos tres candidatos nas primarias do PSdG, Juan Díaz Villoslada é o máis novo, non en idade, senón en experiencia na primeira liña da política institucional. Ten un perfil afábel e -metade por instinto, metade por cálculo- afirma non ter nengunha intención de combater sobre a lama. Hai no seu discurso ecos da Nova Política e a asunción de que a alternativa ao PP na Galiza ou é tripartita ou non será. Villoslada protagoniza a entrevista política do Sermos262. Eis un avanzo da conversa.


(...)

-Cando escoitas que te cualifican de "candidato do aparato" que che pasa pola cabeza?

 

-Esa é unha forma de etiquetar que responde a vellas tácticas e non á realidade. Sen ir máis lonxe, os outros dous precandidatos poderíamos dicer que son máis aparatos case que eu. Porque un está igual nos órgaos federais e o outro é portavoz do grupo parlamentar [en alusión respectivamente a Caballero e Leiceaga]. Chama a atención o feito de que a un que é novo lle tilden de aparato cando os outros xa veñen de aparatos anteriores.

 

-A alternativa en Galiza ao PP é unha alternativa a 3?

 

-Hoxe por hoxe é necesario que todas as forzas da esquerda en Galiza traballemos coa máxima coordenación. Falar de coordenación é falar de estar de acordo en moitos pontos de encontro. En políticas sociais, en políticas culturais, de servizos públicos, lingüísticas. Logo hai outros pontos en que é máis difícil evidentemente coincidir. En todo caso, isto xa o temos acreditado en gobernos onde ou hai coligazóns ou ten habido acordos de investidura. Mais iso non quer dicer que nós como partido socialista, cunha tradición e cunha historia de políticas progresistas e de goberno, temos loxicamente a pretensión de ser de forma clara a primeira forza da esquerda en Galiza. O que si é certo é que o mapa político, socio-eleitoral, hoxe é distinto do que era a época do bipartidismo, e en Galiza iso éo dunha maneira máis acusada. En todo caso, nós o que pretendemos é convencer o maior número de galegos e galegas progresistas de que o Partido Socialista é quen de aglutinar máis todas estas sensibilidades.

 

-Estás a favor de o secretario xeral entrante ser tamén o candidato do PSdeG á Xunta ou optarías máis ben por un modelo de bicefalia.

 

-Nestes momentos, e após tanto tempo ou ben de provisionalidade ou ben de cambios internos, consolidar un novo liderado ten que ter unha perspectiva de futuro. Entón si sería viábel esa posibilidade [a de o líder do partido ser também cartaz eleitoral] para evitar esa bicefalia. En todo caso, ese é un proceso que hai que analisar e haino que facer cos militantes.

 

[A íntegra da entrevista, unha dupla páxina, aparece no Sermos262, disponíbel na nosa loxa e nos pontos de venda habituais].



x