TERÁ DE DAR CONTA SOBRE A CONTABILIDADE B DO PP

Rajoy, chamado a declarar como testemuña no xuízo da Gürtel

Rajoy, chamado a declarar como testemuña no xuízo da Gürtel
Rajoy, no balcón da rúa Génova na noite eleitoral das xerais de 2016
Rajoy, no balcón da rúa Génova na noite eleitoral das xerais de 2016  

A Audiencia Nacional española chama o chefe do executivo estatal a prestar declaración na súa calidade de dirixente do PP e a petición da acusación popular. A Fiscalía, dependente organicamente do executivo, opúxose á comparecencia por entender que Rajoy non tiña nada que achegar a esta causa.


A declaración de Rajoy versará sobre a súa etapa como secretario xeral e director en varias campañas eleitorais durante a fase inicial da trama Gürtel (1999-2005).

A súa presenza no xuízo como testemuña foi demandada pola acusación particular que exerce a Asociación de Avogados Demócratas de Europa (ADADE). O tribunal aceitou a petición por maioría: dous dos maxistrados pronunciáronse a prol, o terceiro restante en contra.

A Audiencia toma esta decisión co criterio en contra da fiscalía, unha instancia do poder xudicial que no Estado español depende organica e hierarquicamente do poder executivo.

A fiscal Concepción Nicolás considerou "inútil e innecesaria" a proba testifical de Rajoy (isto é, a súa participación como testemuña no proceso xudicial). 

Os xuíces aceitan os argumentos da acusación popular e consideran, en troca, que Rajoy si ten cousas a dicer sobre a existencia dunha contabilidade B no partido.
 



x