Todo indica que dúas candidaturas concorrerán na Asemblea de Anova

Todo indica que dúas candidaturas concorrerán na Asemblea de Anova
Un aspecto da primeira asemblea nacional de Anova
Un aspecto da primeira asemblea nacional de Anova  

O prazo para a apresentación de listas conclúe esta sexta feira ás 14 horas. A hipótese de que cristalice unha candidatura de consenso, pola que pelexa Antón Sánchez (número 1 da lista oficial), é neste momento moi improbábel.


A militancia de Anova elexerá este sábado entre dúas candidaturas distintas na súa III Asemblea Nacional, a se realizar en Pontevedra, salvo que fructifique a última hora a tentativa de formar unha candidatura de consenso. A hipótese dun acordo in extremis non se desbota, mais, segundo puido saber Sermos, é "moi improbábel".

Quen competirá no conclave? Pois dun lado a candidatura que lideraría Antón Sánchez, até agora coordenador da formación, e na que figuran nomes como o líder histórico Xosé Manuel Beiras e o alcalde de Santiago, Martiño Noriega. Doutro, a lista que promovería Davide Rodríguez, parlamentar no Pazo do Hórreo e que xa se desmarcou do sector oficial nas primarias de En Marea ao promover a lista Somos Quen.

A Asemblea Nacional elexerá este sábado o máximo órgao da formación entre conclaves, a Coordenadora Nacional, con 50 integrantes. Posteriormente, a Coordenadora sumará outros 25 membros, en representación dos distintos territorios en que Anova está organizada.

Será esa Coordenadora Nacional, e non a Asemblea directamente, a que elexa portavoz nacional.

O sector nucleado arredor de Davide Rodríguez apresentou no debate dos textos unha emenda de eliminación de parágrafos do documento en que se enfatizaba o carácter estratéxico da confluencia de Anova con forzas non nacionalistas.

Isto non significa que Somos Quen poña en dúbida a existencia de En Marea como proxecto (de feito participou activamente na asemblea da confluencia propondo Luís Villares como portavoz). Mais ben estaríamos perante unha diferenza táctica, sobre onde debe pór o acento Anova neste momento (se no eixo nacional ou no da esquerda-direita), antes do que perante unha controversia sobre a orientación estratéxica.



x