Villares salva a portavocía única con 241 apoios fronte a 209 votos críticos

Villares salva a portavocía única con 241 apoios fronte a 209 votos críticos
Aspecto do plenario, que na sesión de tarde non se desenvolve na sala principal do Pazo de Congresos
Aspecto do plenario, que na sesión de tarde non se desenvolve na sala principal do Pazo de Congresos  

En Marea continuará a ter un único portavoz orgánico, Luís Villares. Na votación de maior alcance do plenario, a emenda de Recuperar En Marea apenas alcanzou 209 apoios, fronte aos 241 votos que respaldaron a opción do relatorio oficial. Decae, por tanto, a portavocía colexiada, paritaria e rotatoria que defendían Anova, Podemos Galicia, Esquerda Unida e a Marea Atlántica do ausente Xulio Ferreiro.


241 votos a favor da continuidade dunha única portavocía para En Marea (a de Luís Villares). 209 a prol dunha portavocía colexiada, paritaria e rotatoria, a se renovar cada seis meses. Ese é o resultado da votación chave deste plenario. A medición das forzas de cada un dos segmentos organizados deita un score de 53,5 por cento contra 46,5 por cento.

 

Villares salva a súa lideranza, mais faino de forma axustada e nun plenario claramente marcado pola baixa participación, a inferior de todas as citas asembleares da confluencia. En realidade, o grupo dirixente só ten o apoio declarado de 10 por cento do censo de inscritos e inscritas (241 votos face 2.400 persoas con direito a participar). En todo caso, Villares gaña algo moi importante en política, tempo, e pode preparar os seguintes embates desde a lexitimidade que lle dá ter gañado este pulso.

 

No debate da súa emenda á totalidade ás teses organizativas, a corrente crítica reiterou o seu coñecido argumento de que a portavocía de Villares non é tal, senón que na práctica é "unha secretaría xeral", do mesmo modo que o "partido instrumental" -a fórmula xurídica en que se ten materializado a confluencia- non sería tal e si un "partido máis".

 

Por súa parte, o grupo dirixente argüíu, por boca da viceportavoz Ana Seijas, que a actual Coordenadora (Executiva) se limita a executar as funcións e as orientacións políticas deseñadas polo Consello (máximo órgao entre plenarios), de xeito que en ningún caso se pode asimilar a portavocía a unha secretaría xeral.

 

Seijas razoou que a portavocía actual xa é paritaria ("temos dúas viceportavocías") e colexiadas (o funcionamento sería horizontal e non hierárquico). Ao único que non lle vía sentido era a incorporar unha rotación pautada cada seis meses. A incorporación dese criterio tería suposto a saída de Villares da dirección. O ex xuíz evítaa cunha vitoria orgánica que en parte cabía agardar após unha parte considerábel do conglomerado opositor (Esquerda Unida e Podemos Galicia) ter feito un chamado explícito a non participar na asemblea.

 



x