Un de cada cinco traballadores mortos en Galiza en sinistros laborais é mariñeiro

Un de cada cinco traballadores mortos en Galiza en sinistros laborais é mariñeiro
Imaxe do libro 'Pleine mer', do fotógrafo Jean Gaumy
Imaxe do libro 'Pleine mer', do fotógrafo Jean Gaumy  

Desde 2010 até setembro de 2016 morreron 70 mariñeiros galegos en sinistros laborais. O noso país rexistra un índice de incidencia superior aos estándares europeos.


Entre xaneiro de 2010 e setembro de 2016 un total de 70 mariñeiros galegos perderon a vida en sinistros laborais. Supón un de cada cinco traballadores que morreron en accidentes no traballo en Galiza nese mesmo período (foron 349), o 20%. Unha porcentaxe preocupante se temos en conta que o sector do mar, embora a súa importancia, non sobrepasa os 24.000 empregos en Galiza. O que supón unha pequena parte do total.  Rexistramos índices de incidencia que sobrepasan todos os estándares europeos: 103,8 sinistros mortais e 285 graves por cada cen mil traballadores en 2014 no sector do mar.

Entre xaneiro e setembro do ano pasado faleceron 12 mariñeiros, unha cifra superior á de todo 2015 (10 falecidos no sector do mar en sinistro laboral). Desde 2010 a 2016 o ano máis tráxico foi o 2014, cando houbo 20 mortos. Nese mesmo período, o exercicio no que menos traballadores perderon a vida no sector do mar foi o 2012, con 5.

Mais nestes seis anos non só se rexistraron accidentes mortais no sector do mar. Tamén os houbo de carácter grave: perto de 340. O que supón unha media superior á dun mariñeiro feriodo grave en accidente laboral cada semana. Sinistros leves foron, nestes anos, perto de 7.500. O que supón unha media de 24 sinistros leves no mar cada semana.