Crónica dun accidente anunciado: falece un operario nos traballos de ampliación da ponte de Rande

Crónica dun accidente anunciado: falece un operario nos traballos de ampliación da ponte de Rande
Protesto da CIG nas obras de Rande
Protesto da CIG nas obras de Rande  

N.G.C, de 54 anos, precipitouse desde 5 metros de altura. CIG protestara hai dúas semanas nesa obra para denunciar as condicións laborais dos traballadores.


N.G.C, de 54 anos e natural de Canarias, faleceu esta cuarta feira, 5 de xullo, candoe staba a traballar nas obras de ampliación  da autoestrada AP-9 na Ponte de Rande após precipitarse desde unha altura de 5 metros. Até o lugar desprazáronse efectivos de emerxencias e sanitarios, mais nada se puido facer pola vida deste operario que traballaba para unha subcontrata.

 

Hai apenas dúas semanas, a CIG desenvolveu unha actuación en Rande para chamar a atención sobre as condicións laborais “de explotación” que se dan nesta obra, e que xa foron denunciadas no parlamento de Galiza. O sindicato advertía do perigo para a integridade física dos operarios que supoñían as xornadas laborais de até 12 horas, en moitos casos a unha altura de 60 metros e a pleno sol. “Aínda que se cumprisen todas as medidas de seguridade, que tampouco é o caso, os excesos de xornada provocan fatiga e cansanzo que en moitas ocasións están detrás dos acidentes laborais, neste caso con consecuencias fatais”, censura Xoán Xosé Melón, secretario nacional da CIG-Construción.

 

Para Melón, o acontecido nesta cuarta feira é “a crónica dun accidente anunciado” xa que, segundo denuncia, “dábanse todas as condicións para que se producise un sinistro tan grave como o que tivo lugar”. De feito, segundo relatan os compañeiros do falecido, o mes pasado tivo lugar outro accidente laboral nas obras, aínda que nesta ocasión foi de menos gravidade. Con todo, un operario perdeu varias falanxes dunha man.



x