Tráfico arquiva as denuncias polo uso do galego nos sinais das autoestradas

Tráfico arquiva as denuncias polo uso do galego nos sinais das autoestradas
As redes sociais partillaron imaxes coma esta para exixir o dereito a usarmos a lingua de noso nas sinais de tráfico
As redes sociais partillaron imaxes coma esta para exixir o dereito a usarmos a lingua de noso nas sinais de tráfico  

A DGT considera o acontecido "un problema de tipo sentimental" coa lingua e non "de seguranza vial" polo que as sancións non serán tramitadas. O Valedor do Pobo anunciou que requirirá á Delegación do goberno español que "informe" sobre aquelas medidas que prevé desenvolver para que a sinaléctica se rotule en galego


 

A Dirección General de Tráfico asegurou esta cuarta feira ao xornal La Voz de Galicia que as sancións impostas a Audasa verbo da sinaléctica en lingua galega non serán tramitadas. Para o director da DGT na Galiza, Pedro Pastor, as denuncias serán arquivadas ao non contar con suficiente base argumental que xustifique as sancións impostas á empresa concesionaria. 

Neste senso, Pedro Pastor considerou que o acontecido supón máis "un problema de tipo sentimentan co idioma" que un risco para a seguranza viaria polo que non serán tramitadas. Porén, a lei continúa a exixir que nas nacións con lingua de seu como Galiza os sinais de tráfico deben empregar obrigatoriamente "o idioma español oficial do Estado". 

A polémica xerada após facerse pública a sanción imposta a Audasa en relación cun cento de denuncias interpostas pola Garda Civil española, deu para numerosas brincadeiras nas redes sociais que logo se fixeron eco da nova. @s internautas galeg@s criticaron con dureza non só que as forzas españolas multen as empresas polo uso da lingua propia do país senón que a lei "protexa" o español e obrigue a que as sinais de tráfico se rotulen nesta lingua en detrimento dunha xa cativa presenza do galego nas estradas. 

Desde o Valedor do pobo e logo dunha visita do presidente da Mesa pola Normalización Lingüística, Carlos Callón, o alto comisionado anunciou esta mesma mañá que solicitarán un informe da Delegación do Goberno para lle requerir que medidas se emprenderán para garantir a rotulación na lingua propia da Galiza. Aliás, informou o responsábel deste órgano, iniciarán unha investigación "sumaria e informal" ao respecto. 

Para esta quinta feira (23 de maio) A Mesa mantén convocada unha concentración na compostelá Praza do Toural contra as sancións do Goberno español polos sinais en galego. 



x