Os golpes de estado xa non son o que eran... ou polo menos amosan outra imaxe. O maior desafío democrático no reino de España desde a morte do ditador terá unha resposta unionista contundente que xa está en marcha.

 

Tres formacións políticas -PP, PSOE e Ciudadanos- coincidiron en resolver “o problema catalán” á forza, ou sexa empregando todas as armas da legalidade postfranquista. Amparados por un tribunal elixido por estes mesmos partidos (aquí a cidadanía non tivo opción), apoiarán as anunciadas accións represivas do goberno español logo de que o Parlament votara as leis para permitir o referendo e posterior desconexión de España. Os pasos a partir de agora seguen ao pé da letra as regras básicas dos golpes de estado clásicos: reducir as forzas das institucións democráticas como deputados ou alcaldes, eliminar calquera resposta armada e ocupar os medios de comunicación.

 

Estas ameazas non son virtuais, levaranse a cabo fisicamente e, para mostra, o aviso televisivo duns cantos axentes da Garda Civil acosando unha imprenta pola “ilegalidade” de imprimir material para o referendo

 

A primeira das medidas xa está en marcha e o Tribunal Constitucional apercibiu os 948 alcaldes cataláns e os 62 cargos da Generalitat de que as súas accións terían consecuencias mesmo penais ao tempo que facía o mesmo cos Mossos e os medios públicos de Catalunya. E estas ameazas non son virtuais, levaranse a cabo fisicamente e, para mostra, o aviso televisivo duns cantos axentes da Garda Civil acosando unha imprenta pola “ilegalidade” de imprimir material para o referendo ou as denuncias de varios representantes municipais, como a alcaldesa de Berga, de que ese mesmo corpo militar está a reforzar a súa presenza no interior de Catalunya.

 

Diante desta situación, a resposta cidadá en Catalunya é exemplar. Este 11 de setembro, o seu Día Nacional, voltará ás rúas co berro democrático do dereito a decidir. Galiza e Europa deberían estar ao seu carón.