O alcalde da Coruña inaugura a Feira do Libro en español e pecha o acto a banda co himno de España

O alcalde da Coruña inaugura a Feira do Libro en español e pecha o acto a banda co himno de España
Carlos Negreira
Carlos Negreira  

Cun intenso programa no que se ofrece a máis relevante oferta da cultura galega no verán coruñés, a Feira do Libro inaugurouse nesta quinta feira cun acto institucional no que o alcalde da cidade fixo a súa intervención en español. A Banda Municipal da Coruña pechou o acto co himno español. 


Distintos representantes institucionais alén de persoas do mundo da cultura asistiron á inauguración da Feira do Libro da Coruña que, singularmente, rematou coa interpretación do himno español. A sorpresa foi compartida por moitas das persoas asistentes xa que é a primeira vez que acontece nas distintas citas da Feira do Libro en cidades e vilas. 

A actuación da Banda veu precedida da intervención do alcalde da cidade, Carlos Negreira, que deu lectura a un texto institucional integramente en español. Só despois de rematar, dirixíndose directamente ás persoas asistentes, o alcalde empregou o galego para lembrar ás vítimas de Angrois. 

Canda o alcalde da Coruña, participaron na inauguración a presidenta da Federación de Libreiros, Pilar Rodríguez, o presidente da Deputación da Coruña, Diego Calvo, e o Conselleiro de Educación e Cultura, Xesús Vázquez. A encargada do pregón inaugural foi a escritora Yolanda Castaño que leu un texto literario no que reivindicaba a Coruña como cidade das letras e da cultura galegas.