Alicia Fernández faise co Fiz Vergara Vilariño de poesía

Alicia Fernández faise co Fiz Vergara Vilariño de poesía
[Foto: AELG] Alicia Fernández
[Foto: AELG] Alicia Fernández  

A poeta Alicia Fernández gaña a XIX edición do Premio Fiz Vergara Vilariño coa obra Mamá Pelicano, da que o xuri destacou a perspectiva descarnada sobre a maternidade e a familia.


Mamá Pelicano, de Alicia Fernández, presentado baixo o lema A escena ábrese ante un público inexperto, recibe o premio Fiz Vergara Vilariño. Alén do recoñecemento, o galardón inclúe a publicación da obra pola editorial Espiral Maior e un premio en metálico de 6000 euros.

O xuri estivo composto polas escritoras Lara Dopazo, Xosé María Álverez Cáccamo e Miriam Ferradáns, coa concelleira de cultura de Sarria, Reyes Abella, e a presidenta de Ergueitas, María Casar. Na súa escolla, as cinco integrantes destacaron por unanimidade o “tratamento da familia e a maternidade desde un punto de vista descarnado” que presenta o poemario. Así mesmo, o fallo do premio fai fincapé na unidade do conxunto cunha “concatenación de imaxes sorprendentes e impactantes”, que se enlazan nun mundo de gran riqueza simbólica atravesado pola “perspectiva feminista transversal”.

[Foto: A.C.Ergueitas] O xurado do Premio da XIX Edición do Premio Fiz Vergara Vilariño

Alicia Fernández, nada en Escairón (O Saviñao) en 1987, estudou filoloxía Galega na Universidade de Santiago de Compostela. É autora do libro Botar o mar polos ollos (2005), e figura en varias obras colectivas como Sempre mar. Cultura contra a burla negra (2003), No seu despregar (2016) ou 13. Antoloxía da poesía galega próxima (2017). Así mesmo, publicou poemas en revistas literarias como A caramuxa, A ciegas, Dorna e Xistral.

A galardoada xa ten no seu currículo outros recoñecementos entre os que destacan o Premio de poesía Francisco Fernández del Riego, o Premio de poesía Francisco Añón e o Premio de poesía Díaz Jácome.