ORGANIZA TRECE ROEIS

Batalla de bandas en galego en Ferreira de Pantón

Batalla de bandas en galego en Ferreira de Pantón
Detalle do cartel do festival Trece Roeis, en Ferreira de Pantón. Imaxe: cedida.
Detalle do cartel do festival Trece Roeis, en Ferreira de Pantón. Imaxe: cedida.  

O obxectivo de “impulsar e difundir a música independente galega” é o fin da batalla de bandas organizada en Ferreira de Pantón pola asociación cultural Trece Roeis. Desde o pasado 27 de marzo e até o 7 de xuño está aberto o prazo de inscrición de proxectos. Dezaseis deles pasarán á fase final da batalla.
 


Escollidos por un “xurado profesional”, estes 16 grupos -cuxa selección publicarase nas redes sociais de Trece Roeis o 11 de xuño- actuarán o 13 de xullo, en orde decidida por sorteo e por un tempo de 15 minutos. Catro propostas pasarán á final, esa mesma noite, a partir das dez e con media hora por banda.

Á batalla poderán concorrer grupos ou artistas de calquera estilo e residentes en calquera lugar da Península Ibérica. De haber letra na música, deberá ser en galego.

Os gañadores do concurso obterán a gravación, masterización e edición dun disco de 10 ou 12 cancións, un videclip, a difusión do traballo nas plataformas dixitais e cen copias da versión cedé. Ademais, tocarán no festival Trece Roeis 2019. O segundo, unha estancia de dúas noites na Ribeira Sacra e visita guiada por adegas. O terceiro, a visita ás adegas, cinco libros relacionados coa bisbarra, e catro discos de música galega. O cuarto, tres libros, tres discos e produtos do festival.

Nesta ligazón poden consultarse as bases completas do concurso: https://www.treceroeisfest.com/assets/files/INFO%20-%20BASES[3334].pdf



x