'CARPE DIEM' ESTRÉASE EN COMPOSTELA ESTA CUARTA FEIRA

Quico Cadaval dirixe unha adaptación ao teatro do brasileiro Rubem Fonseca

Quico Cadaval dirixe unha adaptación ao teatro do brasileiro Rubem Fonseca
Presentación de 'Carpe Diem'. Co micrófono na man, o director Quico Cadaval, acompañado do elenco, do director de Agadic Jacobo Sutil (á esquerda) e da teniente de alcalde do Concello de Compostela, María Rozas (á dereita). Foto: Concello de Compostela.
Presentación de 'Carpe Diem'. Co micrófono na man, o director Quico Cadaval, acompañado do elenco, do director de Agadic Jacobo Sutil (á esquerda) e da teniente de alcalde do Concello de Compostela, María Rozas (á dereita). Foto: Concello de Compostela.  

É un dos narradores maiores da literatura brasileira. “Linguaxe explícito, violencia, enigma e cinismo son algúns dos elementos que nos excitan e nos desafían da obra de Rubem Fonseca”, explica Producións Teatrais Excéntricas. Baixo a dirección de Quico Cadaval, estrea esta cuarta feira Carpe Diem no Teatro Principal de Compostela.
 


“A anécdota é cinematográfica: unha muller e un home coñécense nunha previsíbel festa de fin de ano e comezan unha relación ilícita: os dous son casados. Con outras persoas. Un caso de adulterio entre persoas de clase alta”, resume a compañía a súa aposta. Trátase da adaptación dun relato de Fonseca, “o maior escritor vivo da lingua portuguesa”: “A atrevida tentativa de converter en teatro un dos máis excitantes contos do maior autor vivo na nosa lingua”.

Segundo Producións Teatrais Excéntricas, nunca antes se representara en Galiza un texto de Rubem Fonseca. “Tampouco, que nos saibamos, en Portugal”. O brasileiro, nado en Juiz de Fora (Minas Gerais) en 1925, é autor dunha extensa obra en que salientan títulos como Vastas emoções e pensamentos imperfeitos (1988), O Caso Morel (1973) ou O seminarista (2009).

A peza dirixida por Quico Cadaval estará en cartel no Principal cuarta, quinta e sexta feira a partir das 20.30 horas, con entradas 12 euros e reducidas a seis para algúns colectivos. Despois irá ao cinema Elma na Pobra do Caramiñal (31 de marzo), ao Principal de Ourense (7 de abril), ao Auditorio Municipal da Illa de Arousa (3 de maio) e á Casa da Cultura Pintor Llorens de Sada (9 de xuño).

María Costas, Marcos Vieitez, Vítor Mosqueira e Mon Orencio conforman o elenco de Carpe Diem.