Caxade “revélase” como mellor artista nos Premios Opinión

Caxade “revélase” como mellor artista nos Premios Opinión
Alonso Caxade
Alonso Caxade  SG

Caxade pecha un extraordinario ano co Premio Opinión ao mellor artista despois de ter publicado o seu primeiro álbum “A Dança dos Moscas” (Discos da Máquina). “Sotaque” de Xosé Manuel Budiño fíxose cos outros dous premios, o de mellor disco do anos e mellor tema orixinal. 


O primeiro traballo de Caxade converteuse na grande revelación da tempada que lle vale agora o ser escollido como mellor artista nos Premios Opinión que se entregaron a noite da sexta feira na Coruña. “”A Dança dos Moscas”, editado polo selo cooperativo “Discos da Máquina” esgotara en só o mes a súa primeira tirada e conseguira o aplauso da crítica e do público. A musicóloga Dorothé Schubarth foi galardoada co premio “Andaina Senlleira” polo seu traballo na recollida de pezas tradicionais nos anos setenta e comezos dos oitenta. 

Renovador da música tradicional, como mostrou coa interpretación da noite como compoñente do grupo Pel de Noz, Alonso Caxade recibiu o premio cunha intervención na que pulou por unha tradición que estea presente nos novos ritmos, conservando a súa esencia e a súa riqueza musical. 

Xosé Manuel Budiño recibiu dous dos premios da noite, o de mellor traballo polo seu disco “Sotaque” e o de mellor canción orixinal por “Déixame adiviñar”, tema no que tamén participou o actor Carlos Blanco e que interpreta no disco o portugués Antonio Zambujo. 

Os premios do folk galego que cada ano convocan á música de raíz na Coruña entregáronse nun acto no que tamén se sentiu a música de Anxo Pintos e Serxo Ces, o cuarteto Saiva Nova e o gaiteiro Pablo DeVigo.