Sermos Galiza

  • Domingo 21 xullo 2019
EN DESTAQUE

PRESENTACIÓN DO ENSAIO 'OS AMORODOS DE BERGMAN'

O cinema como unha segunda oportunidade da memoria

Redacción 01 xullo 2019 13:37 h.
O cinema como unha segunda oportunidade da memoria
Detalle da cuberta de 'Os amorodos de Bergman', de Fernando Redondo.
Detalle da cuberta de 'Os amorodos de Bergman', de Fernando Redondo.  

Un cento de pezas dun minuto de duración, filmadas na Galiza entre 1925 e 1934 pola Sociedade de Amigos do Campo, conforman o material sobre o que o profesor Fernando Redondo Neira construíu o seu ensaio Os amorodos de Bergman, premio Ramón Piñeiro que se presenta esta terza feira, 2 de xullo, na libraría Couceiro de Compostela.

Publicado por Galaxia, o libro “traslada a reflexión sobre a imaxe en movemento ao que se podería considerar unha teoría da percepción: o cinema como unha segunda oportunidade da memoria”. Faino a partir do valioso rexistro fílmico da Sociedade de Amigos do Campo, con base en Ferrol, liderada por Alfonso Piñón e integrada por membros da burguesía que procuraban coñecer o país e, dalgún xeito, documentalo. Dela chegaron a facer parte o alcalde socialista e galeguista do Ferrol republicano Xaime Quintanilla ou o veterinario Rof Codina.Os-amorodos-de-Bergman

As fitas, rodadas cunha cámara Packard 9,5 mm, están depositadas no Centro Galego das Artes da Imaxe (CGAI), que as restaurou. Á institución chegaran da man do seu director, Guillermo Escrigas, logo de 50 anos en caixas, con cadansúa etiqueta identificativa.

“A película é memoria feita cousas que se ergue ao mesmo nivel da vivencia”, subliña a editorial Galaxia na nota de lanzamento da novidade, “para os membros da Sociedade Amigos do Campo, o gravado pola cámara supoñía a posibilidade de enfrontar lembranza e representación, pasado e presente, sensacións e significado”.

As imaxes que serven de base a Os amorodos de Bergman recollen escenas costumistas, mulleres con olaría ou as rúas de Buño (Malpica) e, de maneira inaudita para a época, gravan por toda a xeografía galega, cando a maior parte do audiovisual galego primitivo facíao na costa.

Máis novas
  • A máis completa radiografía das asociacións culturais durante o franquismo, no Festigal
    cultura
    A máis completa radiografía das asociacións culturais durante o franquismo, no Festigal

    O vindeiro 25 de xullo, ás 18.30 horas, o Festigal acollerá a presentación dun novo número da publicación Terra e Tempo titulada Resistencia e expansión cultural. Crónica do movemento cultural galego na ditadura (1961-1976). O volume recolle artigos de trinta e dúas autoras e autores sobre vinte e cinco asociacións culturais e será presentado por María Pilar García Negro, Nemesio Barxa e Pilar Allegue.

  • Descobren as primeiras pinturas rupestres sobre granito na Galiza
    cultura
    Descobren as primeiras pinturas rupestres sobre granito na Galiza

    No marco do proxecto de recuperación patrimonial, paisaxística e etnográfica que realiza un equipo de investigadoras da Universidade de Vigo na contorna do xacemento do Castelo de Lobarzán/A Ceadá das Laxes das Chas, en Monterrei e Oímbra, veñen de descubrise as primeiras pinturas rupestres da tradición esquemática sobre granito. Trátase dos primeiros motivos que se atopan neste tipo de soporte na Galiza.

  • Reivindicar a historia de noso desde o Pico Sagro
    cultura
    Reivindicar a historia de noso desde o Pico Sagro

    “Que a fogueira do esprito siga quentando as vosas vidas e que a fogueira do lume nunca deixe de quentar os vosos fogares”. Máis un ano, e desde 2011, o Alba de Gloria, de Castelao, volveu pronunciarse desde o alto do Pico Sagro para recuperar o espírito nacional do autor do Sempre en Galiza e das Irmandades da Fala.

  • Quico Cadaval analiza a historia do teatro galego desde as Irmandades a hoxe
    cultura
    Quico Cadaval analiza a historia do teatro galego desde as Irmandades a hoxe

    “As Irmandades da Fala tentaron ocupar todas as áreas do coñecemento, da arte e da comunicación en galego, e foi así como a lingua entrou no teatro burgués. Un caso moi significativo, pola grande aspiración que supuxo, foi a creación do poema épico O Mariscal”, explicou o dramaturgo Quico Cadaval no relatorio sobre a historia do teatro galego que impartiu nos Cursos de lingua e cultura galegas “Galego sen fronteiras”que a RAG coorganiza.