Sermos Galiza

  • Domingo 15 setembro 2019
EN DESTAQUE

DESPOIS DE 14 EDICIÓNS

Desaparece o festival de jazz de Vigo Imaxina Sons

Redacción 10 xullo 2019 16:51 h.
Desaparece o festival de jazz de Vigo Imaxina Sons
Imaxe do festival Imaxina Sons. Foto: Deputación de Pontevedra.
Imaxe do festival Imaxina Sons. Foto: Deputación de Pontevedra.  

Durante 14 edicións consecutivas, o festival de jazz Imaxina Sons levou a Vigo figuras de primeira orde desta música de orixe afroamericana, de Hermeto Pascoal a Marc Ribot, de Luísa Sobral a John Butcher. Logo de mudar de nome en 2018 e pasar a ser Festival de Jazz de Vigo, este ano desapareceu da programación do Concello.

O portavoz do BNG na corporación municipal viguesa  Xabier Pérez Igrexas denunciou esta cuarta feira o sucedido co certame. Lembrou que non hai moito tempo, o alcalde Abel Caballero (PSdeG) prometera converter o Imaxina Sons “nun evento de relevancia europea”. “Converteuno nun evento de silencio”, sinalou.

A última edición xa supuxera unha mudanza na filosofía do encontro. Nun inicio -baixo as direccións consecutivas do contrabaixista Baldo Martínez, do pianista Nani García e da batería Lucía Martínez-, o festival apostou pola promoción da escena galega e europea, amais de por unha acusada vertente vangardista. En 2018, o programa virou máis conservador.

“A cidade parece un tanatorio cultural”, criticou Pérez Iglesias, “e a desaparición deste emblema da política cultural viguesa contribúe á desertización cultural”.

Máis novas
  • O humor negro do romanés Muresanu gaña o festival de curtas de Bueu
    cultura
    O humor negro do romanés Muresanu gaña o festival de curtas de Bueu
    Cadoul de Craciun, un filme que trata en chave de humor negro a represión na Rumanía de Ceauscescu, gañou a décimo segunda edición do Festival Internacional de Curtas de Bueu. Dirixido por Bogdan Muresanu, fíxose coa Ánfora de Ouro -dotada con 2.000 euros- e mais cos premios a mellor guión e mellor actor para o protagonista Adrian Vancica.
  • O Outono de Teatro de Carballo estrea 17 obras na Galiza e enfoca o teatro social
    cultura
    O Outono de Teatro de Carballo estrea 17 obras na Galiza e enfoca o teatro social
    Trinta e oito espectáculos dos que 17 son estreas -nove absolutas e oito na Galiza- conforman o núcleo da 28ª edición do Festival Internacional Outono de Teatro (FIOT) en Carballo. Entre o 27 de setembro e o 1 de novembro, a cidade bergantiñá será a capital escénica do país. “O máis relevante da escena galega e estatal contemporánea, ademais de propostas internacionais chegadas de Portugal e Israel”, indica a organización.
  • Lúas de Outono celebra medio século da Nova Canción Galega
    cultura
    Lúas de Outono celebra medio século da Nova Canción Galega
    O un de decembro de 1968, no Teatro Capitol de Compostela, o poeta Manuel María presentou un monllo de cantautores militantes: Benedicto, Xavier, Guillermo Rojo, Xerardo Moscoso, Vicente Araguas e Miro Casabella. Aquel concerto antifranquista quedou para a historia como o do nacemento da Nova Canción Galega. A homenaxe anual a Manuel María Lúas de Outono conmemórao o vindeiro 25 de setembro no Teatro Rosalía de Castro da Coruña.
  • Bueu convoca unha nova edición do ‘Johán Carballeira’
    cultura
    Bueu convoca unha nova edición do ‘Johán Carballeira’

    O prazo de presentación dos traballos está aberto ata o 31 de xaneiro de 2019.