NOVA EDICIÓN CRÍTICA A CARGO DE ANXO ANGUEIRA

Do “intenso carácter nacional galego” de 'En las orillas del Sar'

Do “intenso carácter nacional galego” de 'En las orillas del Sar'
Estatua de Rosalía de Castro en Padrón. Foto: Luis Miguel Bugallo Sánchez (licenza GNU / Galipedia).
Estatua de Rosalía de Castro en Padrón. Foto: Luis Miguel Bugallo Sánchez (licenza GNU / Galipedia).  

O derradeiro libro de poemas de Rosalía de Castro non foi “unha dimisión”. Ao contrario, o seu “intenso carácter nacional galego” nutre “un salto adiante definitivo” da autora. Desta tese parte o profesor Anxo Angueira na nova edición crítica de En las orillas del Sar (1884).
 


“O seu carácter nacional galego vese tanto no histórico-político como no cultural ou literario”, afirma a nota de Edicións Xerais, que se encarga de publicar o volume. Como o paso chave á hora de situar Rosalía na moderna literatura europea é definido o volume en que volveu ao castelán despois dos totémicos Cantares Gallegos (1863) e Follas Novas (1880).

en las orillas del sar cuberta

A obra viu luz apenas un ano antes da morte da poeta. “Agora que se apaga e que remata, Rosalía edifica unha extraordinaria arquitectura lírica e formal para o acabamento, para as súas voces e os seus límites, para as súas dúbidas e abismos”, di o comunicado editorial, “En las orillas del sar é final e cume dunha escrita extraordinaria”.

O Sar, a Terra de Iria, Compostela, Conxo -daquela un concello de seu-, delimitan a xeografía destes poemas, “o río da vida e o río da literatura”. Na edición de Angueira, el mesmo escritor e presidente da Fundación Rosalía, inclúe un “longo estudo introdutorio”, un “detallado repertorio de notas” sobre os textos e “pormenorizados comentarios” de cada un dos poemas.

Anxo Angueira xa se ocupara antes de compor edicións críticas e anotadas de Cantares Gallegos -publicada en 2013- e de Follas Novas -en 2016-, ambas as dúas tamén en Xerais.