ALGUÉN QUE RESPIRA!, DO 21 AO 23 DE MARZO

Ferrín, Zurita ou Golgona Anghel, no festival de poesía do Concello de Compostela

Ferrín, Zurita ou Golgona Anghel, no festival de poesía do Concello de Compostela
O Teatro Principal de Compostela. Foto: cedida.
O Teatro Principal de Compostela. Foto: cedida.  

A segunda edición de Alguén que respira!, o festival de poesía organizado polo Concello de Compostela co apoio da Xunta, xuntará poetas da envergadura de Xosé Luís Méndez Ferrín, o chileno Raúl Zurita ou a romanesa que escribe en portugués Golgona Anghel. A cita decorrerá do 21 ao 23 de marzo no Teatro Principal.
 


Dirixido por Antón Lopo, el propio escritor e editor, o encontro contará con medio cento de poetas, músicos, actrices. Oito “estreas absolutas de creadores pertencentes a ámbitos heteroxéneos, con linguaxes propias pero unidos pola poesía” vertebrarán unha cita que, segundo a concelleira de Acción Cultural Branca Novoneyra, “apira a se consolidar no calendario cultural da cidade”.

Para intentalo, Alguén que respira! comezará o Día Mundial da Poesía, é dicir, a quinta feira 21 de marzo. A xuntanza, por primeira vez desde a súa disolución hai case tres décadas, do Colectivo Ronseltz consitutirá “unha oportunidade única” de ver en acción Xabier Cordal, Miki Nervio, Manuel Cortés, Xoán Carlos Rodríguez e Serxio Iglesias. Méndez Ferrín lerá o manifesto da xornada, redactado por el mesmo, e haberá recitais das galegas Pilar Pallarés e Estevo Creus, da rumana de orixe pero portuguesa como escritora Golgona Anghel, a catalá Sònia Moll, o asturiano José Luis Piquero e o chileno Raúl Zurita.

O festival dedicará a sexta feira 22 de marzo a investigar as relacións da poesía e a oralidade. Haberá un torneo de versos -slam- en que competirán Esther Carrodeguas, Iolanda Zúñiga, Oriana Méndez, Carmen Conde, Vanessa Glemsel, Luix Kaf, Malvares de Moscoso, Clara Gayo e Silvia Casal, con música de Juanma LoDo. Jon Maia e Amets Arzallus amosarán a técnica bertsolari. A noite pecharase con música, a mestura de rap e jazz experimental de García MC e LAR Legido; Lucía Aldao, e mais o proxecto El Velcro, de Pablo X. Suárez e Dudo.

O sábado, 23 de marzo, lerán poemas Gonzalo Hermo, Ana Romaní, Margarita Ledo, Chus Silva, Elena Medel e Alejandro Palomas na sección Atravesei a Cerca. A poeta Nuria Vil e a banda Rabuda ofrecerán a súa proposta. Alguén que respira! rematará cunha velada en que subirán ao escenario do Principal as actrices Mónica Caamaño e Alfredo Rodríguez; os poetas Afonso Traficante, Silvia Penas e a brasileira Elisa Lucinda; o rapeiro Hard GZ; e Félix Fernández a ler poemas do seu irmán Xabier oito anos despois do seu pasamento.

Durante os tres días, pero de mañá, o festival organiza unha sección paralela, Café con Moha, de mesas de debate sobre a importancia do corpo nas novas linguaxes líricas, o escenario como soporte, a esencia de poema ou a edición de poesía. Coordinarán as discusións as xornalistas María Obelleiro -directora de Sermos Galiza-, Daniel Salgado -redactor de Sermos Galiza-, Caetano Díaz, , Anxo Quintela e Francisco Novo.