CON DIRECCIÓN ESCÉNICA DE QUICO CADAVAL

Leilía repasa a súa historia na nova xira CantarELAS

Leilía repasa a súa historia na nova xira CantarELAS
Leilía na Coruña durante a presentación de 'CONsentimento' en 2012. Foto: Karlos Abal Lobato.
Leilía na Coruña durante a presentación de 'CONsentimento' en 2012. Foto: Karlos Abal Lobato.  

Ás súas voces e mans e coiros e ferreñas corresponde non pouca da responsabilidade na recuperación popular da música de pandeiretas. Tres décadas despois da súa fundación, Leilía repasa a súa historia nunha nova xira, CantarELAS, que comeza este 16 de maio nas Neves.
 


“O espectáculo xunta temas emblemáticos do grupo con outros menos coñecidos”, explica nun comunicado, “sempre cunha coidadísima posta en escena”. Que, desta volta, corre a cargo do dramaturgo Quico Cadaval. “Experiencia musical inesquecíbel”, é o que promete Leilía, con cinco discos no currículo e un amplo e profundo traballo de rescate do folclore.

O seu primeiro disco, homónimo e datado en 1994, “abriu un camiño propio”, a forza de pezas tradicionais. Co tempo, incorporaron instrumentos e “polifonías non tradicionais” en discos como I é verdade i é mentira (1998) e Madama (2003). Neste último empregaron letras con temática actual. Son de Leilía (2005) foi un percorrido retrospectivo aos 15 anos e en CONsentimento (2012) xuntan letras de escritoras con melodías tradicionais.

Integrada por seis mulleres -Ana, Patri, Merchi, Montse, Felisa, Rosario: así se nomean na súa páxina web-, Leilía “forma parte do maxín colectivo galego”. Este CantarELAS xa pechou sete concertos máis alén do das Neves: Portas (17 de maio), Lugo (18 de maio), A Coruña (7 de xuño), Muros (29 de xuño), Ortigueira (14 de xullo), Verín (10 de agosto) e Bergondo (24 de agosto).