SEGUNDA NOVELA DA AUTORA DE 'ESCAPADOS'

Mosaico sobre mulleres que loitan

Mosaico sobre mulleres que loitan
Imaxe da folga do 8M o pasado ano. Foto: cedida.
Imaxe da folga do 8M o pasado ano. Foto: cedida.  

Con Escapados, María del Carmen Rey Núñez presentouse no campo literario cunha historia de maquis no Monte Pindo, asentada en feitos históricos. Autodidacta, a escritora recunca agora cun mosaico de “mulleres que levantan a cabeza, que saen adiante polos seus propios medios” e que titulou directamente Mulleres.
 


Ambas as dúas obras de Rey Núñez (Mazaricos, 1961) están publicadas por Toxosoutos. “Mulleres é unha historia centrada nas vidas de varias mulleres e en como se fan coas rendas da súa existencia arrespoñéndose a todo ao que o mundo as condenou”, explica a editorial, “pode unha muller escapar dun destino marcado pola adversidade?”.

Logo de se adentrar na historia -Escapados decorría nas dúas décadas que seguiron á Guerra de 1936-, a escritora escolle agora o presente. No Prólogo de Mulleres expono sen medias tinas, ao tempo que sinala algunhas vértebras do libro: as maternidades e as condicións de dominación que implican, as decisións libres, as responsabilidades compartidas.

Rey Núñez estruturou a novela en breves capítulos, a partir dos que tece unha narración de corte realista e unha tese, explícita desde o limiar: “Coido que tanto o home como a muller deberan ter as mesmas funcións e gozar dos mesmos dereitos”.