CRÍTICA DE CINEMA DAS SEXTAS FEIRAS

'The Wife', máis perto do teatro do que da televisión

'The Wife', máis perto do teatro do que da televisión
Un fotograma do filme
Un fotograma do filme  

THE WIFE

(Reino Unido-Suecia-EUA 2017, 100 min.)

Dirección: Björn Runge

Guión: Jane Anderson

Fotografía: Ulf Brantas

Música: Jocelyn Pook

Elenco: Glenn Close, Jonathan Pryce, Christian Slater, Max Irons, Harry Lloyd, Annie Starke, Karin Franz Körlof, Elizabeth McGovern, Alix Wilton Regan, Morgane Polanski

 

SINOPSE

Joan é a sacrificada esposa do afamado escritor Joe Castleman, a piques de recibir o Premio Nobel de Literatura. Pero Joan garda un segredo inconfesábel que poría o seu marido nun situación moi comprometida.

 

CRÍTICA

The Wife chega ás carteleiras co título A boa esposa, mais non se trata de ningunha adaptación da serie The Good Wife, senón máis ben a típica ocorrencia desa persoa que se encarga de renomear os filmes que debeu pensar que así tería máis gancho nun vulgar intento de levar á confusión precisamente coa serie emitida por Fox. Após desta aclaración, probablemente innecesaria, imos ao tema...

 

The Wife trata precisamente diso, dunha esposa, Joan Castleman, a esposa do inminente Premio Nobel de Literatura xenialmente interpretada por unha Glenn Close (Atracción Fatal, As amizades perigosas) que apunta a súa sétima indicación aos Óscars... será a vencida? Dálle a réplica Jonathan Price (Brazil, O home que matou a Don Quixote) no rol de Joe Castleman, o marido galardoado pola Academia Sueca con varios momentos tamén para lucir a súa vasta experiencia na dramaturxia. Por separado moi ben, pero xuntos amosan unha química abraiante...

 

A señora Castleman preséntase como a esposa modelo. Unha muller que coida e mima o seu marido sempre cun sorriso nos beizos. Entregada, cariñosa, comprensiva, afábel e permanecendo nun segundo plano para ceder todo o protagonismo á súa famosa media laranxa. Pero baixo esa aparencia de parella ideal agóchanse unha morea de capas de anos continuados aguantando mecha. A súa estadía previa en Estocolmo para a cerimonia dos Nobel provocará que afloren todas esas pantasmas do pasado que precipitarán os acontecementos. E ata aquí podo ler...

 

Conta cuns cantos flash-backs que retrotraen a historia a como se coñeceu o matrimonio Castleman. O xoven Joe está interpretado por Harry Lloyd (A teoría do todo, Jane Eyre) e a xoven Joan por unha tal Annie Starke, unha actriz cun parecido máis que razoábel con Glenn Close. Un rotundo éxito de cásting... pero claro, é que esta actriz é a filla de Glenn Close! Curiosamente a cousa non queda aí, tamén aparece no reparto o fillo de Jeremy Irons (Max Irons) e a filla de Roman Polanski e Emmanuel Seigner (Morgane Polanski). Todo semella quedar en familia...

 

“Eu son eu e as miña circunstancia, e se non a salvo a ela non me salvo eu”, di nun momento dado a personaxe de Jonathan Price citando as Meditacións de Don Quixote, de Ortega y Gasset. Unha forma moi sutil de adiantar de que vai o conto antes de que se desvele o pastel. Unha adaptación da novela homónima da escritora norteamericana Meg Wolitzer que guioniza Jane Anderson, gañadora de varios Premios Emmy que semella máis acostumada a escribir para televisión que para cinema, que tamén... Con todo o ton de The Wife deriva máis cara o teatral ca o televisivo, cousa que en absoluto embaza unha trama continguiduras reivindicativas do rol da muller, tanto no ámbito familiar como no artístico. E por riba o despregue interpretativo de Close é para dar de comer a parte...

 

Dirixe o sueco Björn Runge que non dubida en homenaxear o seu compatriota máis internacional Ingmar Bergman (Segredos dun matrimonio) e deixar certas miguiñas do postureo artístico que Ruben Östlund mostraba na incómoda The Square, iso si, sen a brutal ironía belixerante que tiña esta. A parella protagonista tamén ten puntos en común coa de Big Eyes (2014, Tim Burton) ou Antes do anoitecer (2013, Richard Linklater); pero todo desde a perspectiva xélida do director sueco... ideal para un matrimonio en vías de extinción.

 

Por certo... dixen xa que Glenn Close o borda?