Unha boa imaxe xa non chega

Unha boa imaxe xa non chega
Lucas, presionado por Savic, dispara a porta na ocasión máis clara do Dépor
Lucas, presionado por Savic, dispara a porta na ocasión máis clara do Dépor  

Un penalti máis que discutíbel (en realidade, un non penalti) liquidou as opcións do Deportivo no Metropolitano atlético. Ofereceu un aspecto máis que aseado o combo de Seedorf na súa estrea en tan impresionante marco, mais ao cabo a equipa galega voltou a casa cos petos baleiros. É a 18 derrota do curso. A salvación a estas alturas parece unha quimera.


O Atlético non necesita nada para gañar. Ás veces apenas necesita chutar a porta. Unha desas veces foi este domingo. Contra o Deportivo bastoulle con que Trujillo Suárez vise penalti nunha acción que non pasou dun levísimo empurrón de Pedro Mosquera a Saúl. Un lance que de ser penalti obrigaría a que nun partido houbese infindas penas máximas. Marcou Gameiro o agasallo e a partir daí o Atlético fixo o que mellor sabe facer, non encaixar goles. É a equipa menos vulnerábel do campionato: só recebeu 14 goles en 30 partidos (un menos que o Barça).

 

No primeiro acto, as cousas sucederon máis ou menos como as tiña planificado Seedorf. O Atlético asumiu o mando do xogo e o Deportivo agardou na cova, na procura dalgunha contra. E na cova estaba o pé máis dotado desta equipa, a bota zurda de Çolak. Dela saíron dous pases maxistrais que puxeron Lucas Pérez alí onde un dianteiro soña con estar: con vantaxe franca para marcar. Mais o de Monelos non definiu nun corpo a corpo con Oblak -o medo escénico, a ansiedade por golear (non o fai desde novembro)- e por aí comezou o Deportivo a perder o xogo.

 

Na segunda metade, o Atlético seguiu os seus instintos conservadores e cedeu cancha ao combo galego. En ataque posicional o Deportivo foi moito menos daniño para os atléticos. Apenas unha xogada de perigo en toda a segunda parte -infantilmente fanada por Bakkali- foi todo o que deu producido a escadra coruñesa. Insuficiente para equilibrar o taboleiro de marcas.

 

Digamos por tanto que si, que o Deportivo competiu e mostrou que ten máis fútebol do que mostra a súa clasificación -soubo conter o Atlético, soubo poñelo en certos apuros-, mais a efeitos prácticos a realidade é a que é: 20 pontos en 30 partidos e a 8 (9 se temos en conta o gol average) da salvación. Fican 8 xogos por diante. O Dépor ten que retallar ao Levante máis dun ponto por xogo. Misión case imposíbel.


Atlético de Madrid: Oblak, Carlos Isaac (Diego Costa, min. 64), Savić, Godín, Lucas Hernández, Saúl, Thomas (Toni Moya, min. 88), Gabi, Koke, Correa e Gameiro (Fernando Torres, min. 72).

 

RC Deportivo: Rubén, Juanfran, Albentosa, Sidnei, Luisinho, Guilherme, Muntari (Borja Valle, min. 63), Pedro Mosquera, Emre Çolak (Bakkali, min. 77), Lucas e Adrián (Andone, min. 82).

 

Gol: 1-0 Gameiro, de penalti (min. 34).

 

Árbitro: Trujillo Suárez (c. tinerfeño). Cartóns amarelos a Luisinho (min. 13), Carlos Isaac (min. 28), Lucas (min. 33), Diego Costa (min. 69) e Pedro Mosquera (min. 90+2).

 

Incidencias: partido da 30ª xornada da Liga disputado no Estadio Wanda Metropolitano ante 49.351 espectadoras e espectadores.



x