Un cento de palanadores de toda Galiza cítanse en Poio para ‘O día das estrelas’ da billarda

Un cento de palanadores de toda Galiza cítanse en Poio para ‘O día das estrelas’ da billarda

Organizada pola Liga Nacional da Billarda unirá deporte, cultura, convivio e música.


Os mellores palanadores e palanadoras do país estarán este sábado en Poio, 17 de marzo, na gran festa anual da billarda, ‘O día das estrelas’. Un evento organizado pola Liga Nacional de Billarda (LNB) e que é un escaparate deste deporte tradicional,que desde hai anos deu un pulo importante, con competicións e xogadores en non poucas comarcas de Galiza.

 

A cita deportiva unirá nunha mesma competicións a máis do centenar de palanadores e palanadoras das tres conferencias existentes no país - Rías Baixas, Norleste e Noroeste-  sendo unha boa oportunidade de medir forzas antes da fase final que se disputarán en maio en Compostela.

billarda_2

A cita deste sábado  comezará ás 12:00 cos torneos de "golpeo triplo e perimetral" onde os participantes máis técnicos demostrarán a súa pericia no dominio do palán e a billarda sobre a terra da Reiboa. Xa pola tarde, a partir das 16:00 comezará o "Aberto das estrelas", onde está en disputa unha praza para a final da LNB. Ás 19:30, unha vez rematada a competición deportiva, será a quenda do humor e a música, da man do pallaso Peter Punk e o grupo ‘Blues do País’.

 

Esta competición está organizada pola Conferencia Rías Baixas da LNB da man do equipo de Poio da asociación Armadiña e conta co apoio da Deputación de Pontevedra e do Concello de Poio. Tamén da Bocatería/Pizzería A Reiboa.

 

Imaxes: O varal.



x