O CELTA CONTINÚA A ESCALADA

Aspas, duplamente protagonista no campo do Levante

Aspas, duplamente protagonista no campo do Levante
Aspas proba fortuna
Aspas proba fortuna  

Unha acción do punta de Moaña culminada por Sisto selou a vitoria do Celta no campo do Levante. A equipa viguesa suma xa 25 pontos, máis perto da Europa League do que do descenso. O dianteiro colombiano da escadra valenciá Jefferson Lerma acusou Aspas de proferir contra el insultos racistas. O futebolista celeste nega todo.


Se Messi é o FCB -como en tempos CR7 era o RM-, hoxe Iago Aspas é o Celta. Da inspiración do futebolista de Moaña depende en boa parte a sorte da equipa viguesa. Poucos futebolistas franquicia hai como Aspas. Desequilibrante cando o ten de ser. Cumpridor en todas as facetas do xogo. Aspas nunca se agacha. Sempre anda polo medio. E ten fame, nunca cansa. Este domingo foi, alén do máis, protagonista por partido dobre. No campo e fóra do campo.

Non é doado gañar na casa dunha equipa tan exixida como o Levante, que se debruza sobre o averno, con apenas 18 pontos, metido de cheo na loita por non baixar de categoría. Hai sempre tensión e intensidade nos choques con equipas así. O Celta salvou o asunto na primeira metade grazas ao dominio da bola e a que o Levante asumiu a súa inferioridade técnica, a ceder terreno ao combo vigués na procura dunha contra que desequilibrase o taboleiro de marcas. Foi nese tempo en que se acendeu a luz de Aspas e Sisto non faltou á súa cita co gol. Era o minuto 37. Faltaba un mundo por diante.

Nese mundo sofreu o Celta porque o Levante adiantou as liñas á desesperada. Emerxeu entón outro valor galego do Celta, o gardamallas Rubén, decisivo como en tantos outros xogos do campionato. O porteiro de Mos, aos seus apenas 22 anos, axiganta cada domingo a súa figura, cunha solvencia impropia da súa mocidade. Aspas e compañía dormen tranquilos: Rubén gárdalles as costas.

Aspas nega que dirixise insultos racistas a un rival

Ao remate do encontro, o dianteiro colombiano do Levante Jefferson Lerma acusou Aspas de o ter insultado durante o partido, chamándoo "negro de merda". O punta do Celta -através dun comunicado pendurado na web do clube- nega o incidente. "O que se di no campo fica no campo. Por iso non vou reproducir o que el me dixo a min. En calquera caso, eu non lle chamei o que el me atribúe".

Levante UD: Oier, Luna, Rober, Postigo, Coke, Doukouré (Bardhi, min.84), Lerma, Campaña (Jason, min.46), Morales, Ivi (Mesa, min.79) e Boateng.

RC Celta: Rubén, Hugo Mallo, Cabral, Roncaglia, Jonny, Lobotka, Wass (Radoja, min.72), Tucu Hernández, Sisto (Brais, min.80), Iago Aspas e Maxi Gómez (Sergi Gómez, min.87).

Goles: 0-1, min.37: Sisto.

Árbitro: Álvarez Izquierdo, do comité catalán. Amonestou Morales, Ivi, Doukuré, Coke, Tucu Hernández, Rubén.

Campo: Ciutat de Valéncia.



x