Demandan un marco tarifario estábel para un sector electrointensivo “en crise” en Galiza

Demandan un marco tarifario estábel para un sector electrointensivo “en crise” en Galiza
Imaxe dunha protesta en Alcoa
Imaxe dunha protesta en Alcoa  

A CIG, principal sindicato nesta industria, insta as administracións a implicarse en solucionar os problemas existentes nesta rama da actividade. 


Delegados e delegadas da CIG concentráronse esta quinta feira diante da Delegación do Goberno na Coruña para esixir solucións para a industria electrointensiva. As persoas concentradas demandan a creación dunha tarifa industrial “estábel, predicíbel e competitiva” que recoñeza o estatuto específico deste tipo de empresas con grandes consumos de enerxía.

O secretario xeral da CIG, Paulo Carril, puxo o acento na “grave crise industrial” que atravesa o sector electrointensivo e perante a que cómpre atopar solucións. No camiño destas, sinalou,  un marco estábel para esta industria é obrigado

A CIG fixo entrega ao Goberno español, por cuarta vez, da proposta que elaborou para a creación dunha tarifa industrial estábel, predicíbel para a industria electrointensiva. Esta proposta xa foi remitida tamén á Xunta de Galiza, a patronal do sector e mesmo ao comisario europeo de Enerxía.

Carril tamén quixo denunciar a actitude do Ministerio, que "segue negando a CIG, aínda que é a única organización sindical que ten, dende hai meses, unha proposta para as electrointensivas e a pesar de ter a condición de sindicato máis representativo, ser a primeira forza sindical en Galiza e a primeira neste tipo de industria".

A protesta deste quinta feira enmárcase no calendario de mobilizacións que a CIG ten acordado para esixir "que se adopten as políticas públicas necesarias para defender o interese xeral". Nese marco, nas próximas semanas presentaranse mocións sobre a creación da tarifa industrial en todos aqueles concellos nos que hai instaladas empresas con grandes consumos enerxéticos.