Miles de persoas volven saír á rúa a prol da independencia de Gales

Miles de persoas volven saír á rúa a prol da independencia de Gales

A manifestación en Caernarfon, un dos concellos que aprobou en pleno unha declaración independentista, sumou máis de 8.000 participantes, segundo a organización. Na manifestación independentista de maio en Cardiff asistiran 2.000.


O independentismo galés volveu esta fin de semana á rúa e fíxoo en Caernarfon, un dos quince concellos que aprobou mocións a favor da independencia de Gales. Nesta vila de 10.000 habitantes a mobilización convocada por Yes Cymru e All Under One Banner (AUOB) reuniu 8.000 persoas, segundo a organización. Hai dous meses, en maio, na manifestación independentista convocada en Cardiff a asistencia fora de 2.000 persoas.

A marcha desta fin de semana estivo apoiada por formacións como o Plaid Cymru, Undob ou Ein Gwald. O lema, o tradicional xa nestes meses de mobilizacións: Annibyniaeth (independencia). O apoio a que Gales asuma todas as competencias e se independice vai en aumento a medida que Londres se ensarilla no Brexit, se ben a opción de marchar da UE gañou tamén (a diferenza de Escocia ou Irlanda do Norte) neste territorio.

gales yes cymru

Llywelyn ap Gwilym, portavoz da organización convocante, AUOB, recoñecía recentemente que após o resultado do referendo sobre o Brexit “intensificouse” na sociedade galesa o debate sobre o futuro do seu país. Afirmou que aumenta a idea de que os galeses e galesas estarían mellor se Gales fose unha nación independente, e explicou que con actos como a manifestación do sábado queren que se visibilice esa demanda e que se dea un debate ao redor dela.  

Nesta liña, defenden a independencia tamén como unha vía para enfrontar os recortes impostos desde Londres e garantir un estado do benestar real en Gales. Afirman que todas as décadas de goberno desde a capital británica implicou para este país recortes, pobreza e falla de investimentos. 

Cómpre lembrar que nestas semanas unha quincena de concellos galeses aprobaron mocións e declaracións de apoio á independencia.

Tradicionalmente, o apoio á independencia tiña o respaldo do 10% da poboación, unha porcentaxe que nos últimos anos se incrementou até se situar por riba de 20%.