Piden unha investigación independente sobre as causas da repentina morte de Morsi

Piden unha investigación independente sobre as causas da repentina morte de Morsi
Morsi, na súa época como presidente, nunha cimeira con Putin
Morsi, na súa época como presidente, nunha cimeira con Putin  

A súa morte produciuse ao sufrir un colapso durante o xuízo ao que se viu submetido por supostamente espiar para Hamas. Mohamed Morsi, o primeiro presidente exipcio elexido por vías democráticas, foi deposto por un golpe de estado en 2013 protagonizado polo seu ministro de Defensa, Abdel Fattah al-Sisi, actualmente no poder.


Instalado no poder (acabaría referendando a súa presidencia nas urnas), Abdel Fattah al-Sisi desencadeou unha brutal campaña de represión contra a Irmandade Musulmá de Morsi, o que resultou no encarceramento de miles dos seus activistas, con centos deles a seren sentenciados a morte.

O falecimento de Morsi produciuse durante a celebración dun dos xuízos aos que tiña que facer fronte, desta volta pola súa suposta pertenza a unha rede de espionaxe de Hamas.

Organizacións non gobernamentais de dereitos humanos reclaman que se realice unha investigación independente [nas actuais condicións de Exipto iso é unha quimera] que rodearon o falecimento do presidente deposto, en tanto que o partido Liberdade e Xustiza —brazo político da Irmandade Musulmá—acusa o Goberno de Al-Sisi de ter provocado a morte de Morsi co seu isolamento na prisión, nunha sorte de "asasinato lento deliberado" .

"Retiráronlle a medicación e déronlle comida en más condicións. Non garantiron os seus dereitos humanos básicos", alega Liberdade e Xustiza.

O Goberno de Al-Sisi non ten feito ningunha valoración sobre o deceso de Morsi, mentres os seus medios amigos continúan a tildar de "grupo terrorista" a Irmandade Musulmá.

En marzo de 2018 un grupo de parlamentares británicos denunciaron que as deficientes condicións en que se achaba encarcerado Morsi non cumprían cos estándares internacionais e alertaron de que podían resultar nunha "morte prematura" do ex presidente.

Irán cualificou o falecimento de Morsi de "triste e infortunado" e Qatar e Turquía tamén lamentaron a desaparición do líder islámico.