SESIÓN NO CONGRESO O 25 DE XULLO

PSOE e Unidas Podemos volveranse reunir antes da nova sesión de investidura

PSOE e Unidas Podemos volveranse reunir antes da nova sesión de investidura
Bancada do PSOE no Congreso
Bancada do PSOE no Congreso  

Escasas horas após Pedro Sánchez fracasar na primeira votación de investidura no Congreso, o PSOE púxose en contacto con Unidas Podemos para volver reunirse “en canto poidan” para retomar as negociacións de cara á nova sesión de investidura desta quinta feira.


Após Pedro Sánchez non recibir os votos necesarios para resultar investido presidente do goberno e ante a convocatoria da nova sesión de investidura para esta quinta feira, 25 de xullo, a vicepresidenta do goberno en funcións, Carmen Calvo, xa se puxo en contacto telefónico co secretario de Acción de Goberno de Podemos, Pablo Echenique, e ambos quedaron en volver reunirse “en canto poidan” para retomar as negociacións sobre a investidura de Sánchez.

Calvo non detallou cando pensa negociar con Echenique e limitouse a sinalar que a cita se producirá “en canto poidan e a preparen”

En declaracións aos medios de comunicación, Calvo afirmou que estivo reunida máis de tres horas con Sánchez, o secretario de Organización do PSOE, José Luis Ábalos, e a ministra de Facenda en funcións, María Jesús Montero, para analizar a situación, após non se efectuar o apoio de Unidas Podemos ao PSOE, o que, de mantérense as posicións iguais no pleno do Congreso do vindeiro 25 de xullo e de non producirse unha investidura, haberá que volver ás urnas no mes de novembro nunha nova convocatoria de eleccións xerais. Esta segunda votación do 25 de xullo, o candidato Pedro Sánchez precisa obter un número de votos afirmativos maior que os negativos.

Con todo, a vicepresidenta non detallou cando pensa negociar con Echenique e limitouse a sinalar que a cita se producirá “en canto poidan e a preparen”.

Calvo sinalou que a intención do PSOE é seguir negociando para tentar acadar un acordo antes da segunda votación da quinta feira.

A pasada segunda feira 22 de xullo e unhas horas antes de arrincar a primeira sesión do debate de investidura, precisamente Calvo e Echenique mantiveron outro encontro no Congreso, mais resultou infrutuoso. De feito, o propio Pablo Iglesias avisou a Sánchez desde a tribuna de que Unidas Podemos non se ía a deixar "pisar" nin "humillar" e retou a explicar ao resto do hemiciclo a oferta que estaban a facer á súa formación para ocupar postos meramente "cun papel decorativo".