DEREITOS LABORAIS E SOCIAIS

Folga xeral en Euskal Herria en xaneiro

Folga xeral en Euskal Herria en xaneiro
Presentación da convocatoria de folga pola Carta de Dereitos Sociais de Euskal Herria
Presentación da convocatoria de folga pola Carta de Dereitos Sociais de Euskal Herria  

Canda as centrais ELA e LAB, fan o chamamento ao paro -previsto para a segunda quincena de xaneiro- as asociacións de pensionistas e o resto de axentes sociais que conforman a Carta de Dereitos Sociais. O obxectivo, protestar contra “a precariedade” e reclamar “un traballo, pensións e vida digna”.


Os sindicatos nacionalistas vascos, ELA e LAB, as asociacións de pensionistas e o resto de axentes sociais que conforman a Carta de Dereitos Sociais de Euskal Herria convocaron unha folga xeral para a segunda quincena de xaneiro “sen data concreta aínda” contra “a precariedade” e para reclamar “un traballo, pensións e vida digna”.

Os secretario xeral do ELA (sindicato maioritario), Mikel Lakuntza, e a súa homóloga no LAB, Garbiñe Aranburu, xunto a asociacións de pensionistas e doutros colectivos anunciaron a convocatoria nunha conferencia de prensa en Bilbo esta terza feira, 23 de outubro.

Aramburu sinalou que “coa escusa da crise” foise dando “maior poder ao capital e á patronal” e estes “foron recortando dereitos laborais e sociais”. “A crise de 2008 aproveitouse para continuar a afondar nesas políticas neoliberais”, engadiu.

Lakuntza, pola súa banda, considerou que a folga é “unha gran ocasión” para “recuperar o que nos quitaron nesta última década e para pasar á ofensiva”. Neste sentido, esfarelou as reivindicacións: “pensión mínima de 1080 euros, idade máxima de xubilación aos 65 anos, soldo mínimo de 1.200 euros, xornada de 35 horas semanais, deixar sen efecto as reformas laborais e de negociación colectiva aprobadas nos últimos anos, garantir os dereitos sociais”.

Ao respecto de se contarán con outros sindicatos para a folga, o secretario xeral do ELA dixo que se alguén se quere sumar, “é a súa decisión", aínda que salientou as diferenzas “moi notorias” que teñen coas centrais de ámbito estatal UGT e CC.OO., os que acusan, entre outras cousas, de permitir a xubilación aos 67 anos.