Sinn Fein e SDLP apoian o acordo de May con Bruxelas

Sinn Fein e SDLP apoian o acordo de May con Bruxelas
Mary Lou McDonald, acompañada polo líder histórico, Gerry Adams
Mary Lou McDonald, acompañada polo líder histórico, Gerry Adams  

Portavoces das formacións nacionalistas irlandesas expresaron esta quinta feira o seu respaldo ao contestado acordo de Theresa May con Bruxelas sobre o Brexit. O pacto da primeira ministra do Reino Unido coa UE dificilmente obterá o plácet de Westminster na votación que terá lugar o próximo mes de decembro. O sector crítico do Conservative Party amaga con presentar unha moción de confianza [equivalente á censura] contra May.

 

 


Michelle O'Neill, portavoz do Sinn Fein na asemblea de parlamentares dos 6 condados norteños, e Colum Eastwood, líder do SDLP [Partido Socialdemócrata Laborista, soberanista], mantiveron esta quinta feira un encontro en Dublín con Leo Varadkar,Taioseach [primeiro ministro] da República de Irlanda. Na entrevista participaron tamén representantes da Alianza e dos Verdes, partidos do norte favorábeis tamén á permanencia na UE.

Ao remate do encontro, O'Neill e Eastwood manifestaron o seu respaldo ao pacto selado por May con Bruxelas por considerar que protexe o Acordo da Sexta Feira Santa [O Good Friday Agreement], peza clave na pacificación do norte da illa, e porque, de acordo coa súa opinión, ampara tamén "os intereses do pobo en Irlanda do Norte".

No referendo do Brexit, as e os irlandeses dos seis condados aínda baixo xurisdición británica votaron maioritariamente por se manteren na UE, tal e como tamén o fixeron as e os escoceses.

A líder do Sinn Fein, Mary Lou McDonald, dixo esta quinta feira que no caso de que finalmente non calle o acordo entre Londres e Bruxelas [o previsíbel é que sexa rexeitado polo Parlamento] o seu partido defenderá un referendo: "Agardo que non aconteza, mais se finalmente non hai acordo sobre o Brexit, a señora May ou quen a releve en Downing Street ten que entender que nesas circunstancias a cuestión tería que ser trasladada ao pobo de Irlanda".



x