POLÉMICA VISITA DE ESTADO AO REINO UNIDO

Trump inxírese no debate no Partido Conservador británico ao decantarse por Boris Johnson

Trump inxírese no debate no Partido Conservador británico ao decantarse por Boris Johnson
Trump e a Raíña Isabel II pasan revista ás tropas nunha visita anterior do presidente dos EUA ao Reino Unido
Trump e a Raíña Isabel II pasan revista ás tropas nunha visita anterior do presidente dos EUA ao Reino Unido  

Trump entra sempre como elefante en cacharraría. A diplomacia non caracteriza precisamente a súa forma de facer política. O presidente dos EUA visita esta segunda feira o Reino Unido nun momento en que o partido no goberno, o conservador, está sen cabeza, após a demisión en diferido —aínda se mantén á fronte do executivo—de Theresa May. Jeremy Corbyn criticou Trump por se inxerir nos asuntos internos británicos.


Trump apoia os sectores máis duros do Partido Conservador, aqueles que precipitaron a caída de Theresa May como líder ao apoiar un Brexit duro, isto é, a saída da Unión Europea ao prezo que sexa, mesmo sen acordo de ningún tipo.

Nas vésperas da súa viaxe ao Reino Unido, Trump gabou a figura de Boris Johnson, a quen retratou como o candidato perfecto para tomar o relevo de May. Fïxoo nunha entrevista co rotativo conservador The Sun. O inquilino da Casa Branca avogou tamén por que Nigel Farage, o líder do Brexit Party, xogase un papel relevante na política norteamericana.

Nas filas do Labour Party a visita de Trump levantou acedas críticas. As máis duras levaron a asinatura do alcalde de Londres, Sadiq Khan, o primeiro político musulmán en dirixir a primeira cidade británcia. Nun artigo en The Observer —a edición dominical de The Guardian— Khan equiparou Trump con personalidades da dereita populista e anti-UE como o húngaro Viktor Orbán, o italiano Matteo Salvini e a francesa Marine Le Pen. Serían todos eles, a ollos do alcalde de Londres, representantes dun novo fascismo.

Trump non demorou en contestar o ataque de Khan. No seu campo de batalla favorito, twitter, o presidente dos EUA chamou "perdedor" ao dirixente laborista e emprazouno a que focase a súa atención no "crime en Londres" e non na Casa Branca.

Por súa parte, Jeremy Corbyn tamén empregou as redes sociais para cualificar de "enteiramente inaceptábel" a interferencia trumpiana "na nosa democracia".

O líder laborista non desaproveitou a ocasión para —un dos seus mantras desde a renuncia de May chamar a unha convocatoria anticipada das eleccións xerais. É o electorado británico quen debe elixir "o próximo primeiro ministro" e non os "non representativos 100 mil membros do partido Tory", conclúe.