PALABRAS CON MEMORIA

Cómpre facer boa usanza do léxico da labranza

Cómpre facer boa usanza do léxico da labranza
Cando andedes polos eidos falade con propiedade
Cando andedes polos eidos falade con propiedade  Foto: Wikipedia

Acagoxar.- 1.- Nacer os nabos ocos. 2.- Perder vigor as follas das plantas por causa dunha enfermidade. Tamén se usa acogoxar e cagoxar.

Exemplo : “Estes nabos non serven para nada, están todos acagoxados”.

Lugar de escoita.- Navia de Suarna/Ancares.

Fonte.- CPI Plurilingüe de Navia de Suarna.

 

Acorar.-(Ademais de significados xa rexistrados) Derramarse por exceso de calor.

Exemplo: “Non deixes ao sol as patacas, que aínda han acorar”.

Lugar de escoita.- Pedrafita (Lugo).

Fonte.- José/Endl Navia de Suarna.

 

Bizarro/a.- (Ademais de significados xa rexistrados) Dise das plantas cando están vigorosas e tenras, como cando chove moito, que medran con rapidez.

Lugar de escoita.- Sarria.

Fonte.- Maria Xosé López Castro.

 

Camiñeiro.- (Ademais de significados xa rexistrados) Morea de torróns baixa e alongada para queimar na labranza do centeo.

Lugar de escoita.- O Courel.

Fonte.- Dun vocabulario courelao.

 

Carredal.- Entrada a un eido, onde pode haber unha portela.

Lugar de escoita.- Buciños, Carballedo.

Fonte.- Hortensia Vázquez Fraga.

Outros apuntamentos.- A fonte indica que a palabra foi escoitada de boca de Guadalupe García Álvarez.

 

Estaxe.- (Ademais de significados xa rexistrados) Anchura de cava ou sacha que se leva dunha vez. En Moreda é debasa.

Lugar de escoita.- O Courel.

Fonte.- Dun vocabulario courelao.

 

Gatumeira.-Mato moi espeso, no que é moi difícil penetrar.

Exemplo: “Deixou de rozar as silvas e os toxos e convertéuselle o eido nunha gatumeira”.

Lugar de escoita.- Moa- Vilatuxe, Serra do Candán (suroeste do concello de Lalín).

Fonte.- Daniel Blanco Moa.

 

Outros apuntamentos.- Adoita pronunciarse con gheada.

 

Palabras con Memoria é unha sección que coordena a Asociación de Escritoras e Escritores en Lingua Galega. Todo o material podes consultalo aquí.

 

Se queres achegar algunha palabra que non apareza nos dicionarios, dirixe as túas propostas ao correo [email protected]aelg.org (indicando a palabra, a súa acepción e o lugar en que foi recollida) ou cobre este formulario.



x