O BNG pide institucionalizar o Día da Galiza Mártir

X.M. 13 agosto 2019 13:01 h.

Bará, durante un pleno

Que as institucións públicas galegas honren a memoria de Alexandre Bóveda e das vítimas da ditadura cada 17 de agosto. Que o Estado anule as sentenzas de morte ditadas por razóns políticas, ideolóxicas ou de crenzas. Iso é o que pide unha proposición non de lei que leva a asinatura do parlamentar do BNG Luís Bará e que se acaba de rexistar no Parlamento da Galiza.

A proposición non de lei de Bará vense sumar a iniciativas anteriores do Bloque. En febreiro de 2006, Francisco Rodríguez, na altura voceiro da formación no Congreso, conseguía que a cámara aprobase instar o goberno do Estado a que anulase o consello de guerra sumarísimo que sentenciou a morte Alexandre Bóveda. Nese mesmo ano, en decembro, o Pazo do Hórreo daba luz verde a un texto nacionalista en que se facía un recoñecimento expreso da figura do dirixente do Partido Galeguista. Eran tempos do bipartito e o Parlamento emprazaba o goberno galego a que xestionase perante o executivo presidido por José Luis Rodríguez Zapatero a revocación da farsa xudicial que rematou no fusilamento de Bóveda.

Trece anos despois, o BNG traslada á Cámara unha iniciativa que visa institucionalizar o 17 de agosto como Día da Galiza Mártir e criar un premio que leve tamén esa denominación con vistas a distinguir persoas e entidades que batallen a prol da recuperación da memoria histórica. Aliás, a proposición tenciona anular a sentenza de morte de Bóveda e, en xeral, os expedientes e sancións impostas durante a ditadura "contra cidadás e cidadáns galegos por motivos políticos, ideolóxicos, de crenzas, de raza ou diversidade sexual". O Bloque quer tamén que se programen actividades destinadas a "dar a coñecer a vida e a obra de Alexandre Bóveda e dos compañeiros e compañeiras de xeración que foron perseguidos e asasinados polo franquismo na Galiza".

Que desde a oficialidade da Xunta se ignore esta data, recuperada pola Galiza do exilio en Bos Aires en agosto de 1942, representa "un desprezo absoluto a Alexandre Bóveda e a todo o que simboliza", considera Luís Bará. A figura e o legado de quen, canda Castelao, foi o dirixente de maior peso do Partido Galeguista "deben ser obxecto de recoñecemento, de gratitude e de homenaxe polas institucións galegas, especialmente pola Xunta e polo Parlamento".

Máis novas

memoria
Cruces como símbolo de rebeldía antifascista e feminista

O tradicional evento no que o Instituto de Estudos Miñoráns homenaxea as nove persoas asasinadas por falanxistas no 36 encara a súa última semana de actividades, que este ano estiveron centradas na lembranza da represión contra as mulleres do Val Miñor.
memoria
Historiadoras galegas, vascas e catalás debaten sobre a memoria pública do franquismo e a transición

Decorre en Gernika e conta coa presenza de, entre outras, historiadore e historiadoras galegas como Sara Carou, Uxío Breogán Diéguez, Xosé Estévez ou Lourenzo Fernández.
memoria
Placas de chumbo: un “executor” no rueiro da Coruña
Logo de doce anos da promulgación da Lei de Memoria Histórica, os quinteiros de moitas vilas e cidades galegas seguen a homenaxear moitos afíns á ditadura. Na localidade do Barco dixeron basta e veñen de aprobar no pleno e por unanimidade unha moción na que informan o Concello da Coruña de que teñen unha rúa dedicada a Serxio Peñamaría de Llano, rexedor durante o franquismo que chegou a disparar “tiros de graza” na comarca de Valdeorras. Eis un estrato da peza publicada no número 368 do semanario en papel Sermos Galiza.
memoria
Fraga segue a ser fillo predilecto da Coruña oito meses despois de aprobarse a súa retirada

O Bloque Nacionalista Galego, por iniciativa da concelleira Avia Veira, rexistra unha pregunta ao Goberno local sobre cando ten pensado dar cumprimento ao acordo plenario do 6 de maio de 2019, no que cos votos a favor do propio BNG, PSOE e Marea Atlántica aprobouse a retirada dos títulos e dignidades concedidos en tempos da ditadura ao fundador do Partido Popular e tamén ao ex ministro franquista Laureano López Rodó.