A Deputación da Coruña homenaxeará alcaldes e concelleiros represaliados

Redacción 07 xullo 2016 21:27 h.

De esquerda a dereita, Suárez Ferrín (alcalde da Coruña), Ánxel Casal (Compostela) e Xaime Quintanilla (Ferrol)

Alcaldes e membros das corporacións municipais que padeceron a represión despois do golpe militar de 1936, do que se cumpre 80 aniversario, serán protagonistas dunha homenaxe da Deputación da Coruña que se desenvolverá o vindeiro día 28 de xullo ás 12 da mañá.

En 1936 José López Bouza como presidente e Ánxel Casal como vicepresidente estaban á fronte do goberno da Deputación da Coruña. Os dous foron asasinados despois do golpe militar de 1936. Coma eles, alcaldes de máis de vinte localidades -entre eles os das tres cidades, Alfredo Suárez Ferrín da Coruña, Xaime Quintanilla de Ferrol e Ánxel Casal de Santiago- e concelleiros e concelleiras das corporacións municipais padeceron a represión, en boa medida, polo seu compromiso no cargo público e pola defensa da legalidade institucional quebrantada polos golpistas. Serán os nomes protagonistas da homenaxe que a Deputación da Coruña tributará o vindeiro día 28 de xullo, no mes en que se cumpre o oitenta aniversario do golpe militar que deu inicio á represión.

“A ditadura supuxo tamén unha forte lousa sobre a memoria e, desta maneira, silenciáronse os nomes daquelas persoas que defenderon a legalidade mesmo a costa das súas propias vidas. Oitenta anos despois, continuamos a ter unha débeda de recoñecemento e homenaxe coas vítimas da represión e tamén con todas as resistentes á opresión franquista”, defende a vicepresidenta da Deputación, Goretti Sanmartín, nunha carta que foi remitida a alcaldes e alcaldesas da Coruña en que convida a participar na homenaxe e solicita tamén que, desde os gobernos municipais, fagan partícipes da convocatoria a todos os grupos municipais e persoas vinculadas aos cargos políticos represaliados.

No acto, desde a Deputación lembraremos homes e mulleres que padeceron distintos tipos de represión, principalmente a que se saldou con resultado de morte, que foron concelleiros e concelleiras ou alcaldes/esas das corporacións municipais anteriores a 1936. Na carta remitida por Goretti Sanmartín aos gobernos municipais solicítase tamén colaboración para completar a listaxe de persoas represaliadas das corporacións, na que está a traballar a Deputación. “Estamos a completar a listaxe de concelleiros e concelleiras represaliados mais toda a información, en especial a que chega das propias localidades, é de especial interese para nós co fin de contribuír á recuperación da memoria tamén dos nosos concellos”, anota na carta que xa teñen na súa man alcaldes e alcaldesas dos noventa e tres concellos da provincia.

Máis novas

memoria
De estandarte a bandeira, por Xoán Costa
O 2 de outubro de 1882 La Gaceta de Galicia informa de que se constitúe en Santiago unha sociedade baixo razón social de Rey y Luengo que se vai dedicar á venda de “xéneros do...
memoria
“No franquismo prodúcese unha ruptura coas elites anteriores”
O historiador Adrián Presas acaba de presentar unha tese que estuda como a ditadura franquista creou as súas elites locais nas principais cidades galegas. Coa análise de 4.840 nomes, as conclusións negan que o réxime fose continuista co caciquismo de épocas anteriores. Ao contrario, creou as súas propias elites.
memoria
"Pregunteille se matara no 36 e respondeu: "Non matabamos xente, matabamos bestas"

O xestor cultural, editor e escritor Antón Mascato (O Grove,1957) acaba de dar ao prelo o seu agardado traballo arredor do período republicano, a represión franquista e a resistencia á ditadura no Grove. Atila no Grove, publicado por Edicións Positivas, recolle unha investigación de décadas sobre un tempo na chave na historia da localidade do Salnés.
memoria
As protestas dos galegos escravos en Cuba

10 de decembro de 1854, un grupo de galegos confinados no porto da Habana fan chegar ao capitán xeral de Cuba, José de la Concha, as súas protestas polas condicións nas que se atopaban. O colectivo, formado por parte daqueles emigrantes dislocados á illa para substituír a man de obra escrava, levaría adiante importantes mobilizacións para denunciar a súa situación. Achegamos aquí un capitulo da súa loita.